Uviéu 2031 presenta la composición de la so futura Fundación, con seis instituciones y diez entidaes privaes

Uviéu 2031 dio a conocer les seis instituciones y les diez entidaes privaes que formaríen parte de la Fundación encargada de desenvolver el proyectu. La Fundación namás se va constituyir si Uviéu consigue’l títulu de Capital Europea de la Cultura 2031.

L’anunciu fíxose depués d’una xunta na Casa Conceyu d’Uviéu con representantes de les entidaes participantes. Na presentación intervinieron Alfredo Canteli, alcalde d’Uviéu, Vanessa Gutiérrez, conseyera de Cultura, Política Llingüística y Deporte del Principáu d’Asturies, Rodolfo Sánchez Farpón, director de la candidatura, y Javier Sáenz de Jubera, responsable de Relaciones Institucionales y Patrocinios d’Uviéu 2031.

La dotación inicial prevista ye de 30.000 euros. El 70 % procedería de seis instituciones. L’Ayuntamientu d’Uviéu y el Gobiernu del Principáu d’Asturies aportaríen un 27,5 % caún. La Federación Asturiana de Conceyos, la Universidá d’Uviéu, la Federación Asturiana d’Empresarios (FADE) y la Cámara de Comerciu d’Uviéu contribuiríen con un 3,75 % caúna.

El 30 % restante correspondería a les diez entidaes privaes: ALSA, Fundación Banco Sabadell, Banco Santander, Caja Rural, EDP, Central Lechera Asturiana, Reny Picot, Fundación Izertis, ASAC Comunicación y TotalEnergies. «La idea ye que seya una fundación pública», esplica Rodolfo Sánchez Farpón.

La Fundación encargaríase de preparar y llevar a cabu’l programa cultural recoyíu nel dosier de la candidatura. Ta previsto que la so llabor siga hasta 2034 pa que la esperiencia adquirida y les redes de collaboración creaes durante la capitalidá sigan siendo útiles pal texíu cultural d’Uviéu y Asturies.

Uviéu va defender la so candidatura’l 1 d’avientu en Madrid énte’l comité d’espertos. El 3 d’avientu, el comité va anunciar cuál de les cuatro ciudaes finalistes —Cáceres, Granada, Las Palmas de Gran Canaria o Uviéu— recomienda pal títulu de Capital Europea de la Cultura 2031.