Uviéu defende en Madrid la so candidatura a Capital Europea de la Cultura con «amabilidá» y arguyu asturianu

L’equipu de la candidatura d’Uviéu a Capital Europea de la Cultura 2031 vuelve pa casa dempués d’una xornada intensa en Madrid cola sensación de que fixo un bon trabayu. Tres de meses de preparación, el proyeutu asturianu defendió la so propuesta énte’l xuráu internacional con un mensax marcáu pola «amabilidá», acompañáu d’alusiones a la identidá cultural asturiana —como la tonada, la gaita o les mazanes— y con un equipu que tresmitió convencimientu, ilusión y compromisu col futuru cultural del territoriu.

La delegación asturiana presentó mientres media hora les principales llinies del proyeutu y respondió depués, a lo llargo d’una hora, a les entrugues del comité de seleición, integráu por diez espertos europeos. La decisión sobre qué ciudaes superen esta primer fase del procesu va dase a conocer esti vienres alredor de les 13:00 hores.

L’equipu encargáu de presentar la candidatura tuvo formáu por diez persones llegaes de dellos ámbitos del sector cultural, institucional y científicu. Ente ellos participaron l’alcalde d’Uviéu, Alfredo Canteli; la conseyera de Cultura del Principáu, Vanessa Gutiérrez; el bioquímicu Carlos López Otín; el direutor de la candidatura, Rodolfo Sánchez; o l’exviceconseyeru de Cultura, Jorge Fernández León. La intervención realizóse n’inglés, castellanu y asturianu, destacando la diversidá llingüística y cultural d’Asturies.

La sesión estructuróse nuna primer parte de presentación del proyeutu y un turnu posterior d’entrugues por parte del xuráu, que s’interesó especialmente pol programa artísticu de la candidatura y pola capacidá organizadora y presupuestaria pa sacalu alantre.

El mensax central d’Uviéu xiró alredor del conceutu de la «amabilidá», plantegáu como una respuesta necesaria dende Asturies a un contestu internacional marcáu pola confrontación y el conflictu, proponiendo la cultura como ferramienta pa fomentar el diálogu, el consensu y la empatía.

Llueu de la presentación, de la que l’equipu salió con mui bones sensaciones, l’alcalde d’Uviéu, Alfredo Canteli, destacó’l trabayu realizáu nestos meses. «Con munchos nervios, muncha ilusión, pero tamién con munchu compromisu. L’equipu trabayó muncho y respondió a toles perguntes del xuráu con gran precisión y responsabilidá». Canteli sorrayó amás el sofitu social y territorial a la candidatura: «Uviéu y tol territoriu asturianu tán pendientes de lo que ta pasando güei en Madrid. Tien que pasar dalgo bono. Yo toi cargáu d’ilusión y de ganes porque esto salga, por Uviéu y por toa Asturies».

La conseyera de Cultura, Vanessa Gutiérrez, realizó la so intervención final n’asturianu, destacando’l valor de contar con una llingua propia y minorizada y el so papel como elementu d’identidá cultural. «Hai un proyeutu que va más allá de la ciudá, un proyeutu de toa Asturies que cuenta col total sofitu del Gobiernu del Principáu», señaló.

Gutiérrez sorrayó amás que la candidatura respuende a una visión cultural de llargu percorríu. «Hai una fueya de ruta y un proyeutu que va más allá d’una candidatura a la Capitalidá Europea; tien que ver col porvenir del Principáu y pasa por apostar pola cultura, pola participación y polos derechos culturales de los asturianos».

L’equipu treslladó al xuráu que la candidatura constituye un proyeutu coleutivu sofitáu por persones de distintos ámbitos del sector cultural, alministraciones públiques, entidaes, coleutivos y tamién de calter interxeneracional, reflexando la diversidá del ecosistema cultural asturianu. La propuesta defende la cultura como ferramienta tresformadora pal territoriu, col oxetivu de reforzar el texíu cultural, dar puxu a la participación ciudadana y contribuyir a enfrentar retos como la retención del talentu mozo n’Asturies.

Tres de la capital asturiana presentaron los sos proyeutos Palma de Mallorca, la llocalidá valenciana de Potries y Toledo, siguiendo un orde alfabéticu. El comité internacional anunciará esti vienres qué ciudaes superen esta primer fase del procesu de seleición. La decisión final sobre qué ciudá será Capital Europea de la Cultura en 2031 conoceráse a finales d’esti mesmu añu.