L’equipu d’Uviéu viaxa a Madrid pa defender mañana la so candidatura a Capital Europea de la Cultura 2031

Parte del equipu encargáu de la candidatura d’Uviéu a Capital Europea de la Cultura2031 partió güei escontra Madrid, onde va xuntase col restu de la delegación encabezada por Rodolfo Sánchez Farpón, pa participar na defensa del proyeutu delantre d’un comité internacional d’espertos nel Ministeriu de Cultura. La presentación tendrá llugar mañana pela mañana y forma parte del procesu de seleición que va determinar qué ciudaes siguen na carrera pol títulu de Capital Europea de la Cultura 2031.

Tres meses de trabayu, l’equipu presentará delantre del comité les principales exes de la propuesta, un proyeutu cultural que busca implicar a la ciudadanía, al sector cultural y a tol territoriu asturianu. La iniciativa pon el focu na cultura como motor de tresformación social, diálogu y desenvolvimientu.

Uviéu compite nesti procesu con otres ciudaes españoles que tamién aspiren al títulu: Burgos, Cáceres, Granada, Jerez de la Frontera, Las Palmas de Gran Canaria, Palma de Mallorca, Potries (València) y Toledo.

Mientres la sesión, les ciudaes candidates tendrán d’esponer la so propuesta y responder a les perguntes del comité, encargáu d’evaluar la solidez de los proyeutos y la so dimensión cultural, social y europea.

Una vegada remataes les presentaciones, el comité anunciará el vienres qué ciudaes pasen a la siguiente fase del procesu de seleición. La ciudá qu’algame’l títulu de Capital Europea de la Cultura 2031 n’España va dase a conocer a finales de 2026, tres completase les distintes fases d’evaluación.

La candidatura d’Uviéu aspira a afitar la cultura como exe de desenvolvimientu pa la ciudá y el so entornu, reforzando la so proyeición europea y la so capacidá de xenerar redes culturales en tol territoriu.