La Sala de Cámara del Auditoriu Príncipe Felipe acueye la entrega del Premiu Martínez Torner a Lisardu Lombardía
La Sala de Cámara del Auditoriu Príncipe Felipe acoyó ayeri, miércoles 26 de payares, la entrega del Premiu Internacional de Folclor “Martínez Torner” 2025 a Lisardo Lombardía, figura clave na proyeutación internacional de la música tradicional asturiana y miembru del Conseyu de Capitalidá Cultural d’Uviéu 2031.
L’actu, entamáu pola Conceyalía d’Educación y la Escuela Municipal de Música Tradicional, xuntó a representantes institucionales, axentes culturales y públicu xeneral nun homenaxe que reconoz la trayeutoria de Lombardía como ún de los grandes impulsores de la cultura astur y celta dientro y fuera de les nueses fronteres.
Nel so alderique, el Conceyu d’Uviéu destacó qu’esti galardón celebra non solo una vida dedicada al folclor, sinón tamién la capacidá del premiáu pa teyer redes culturales y poner a Uviéu y Asturies nel mapa internacional de les músiques de raigañu. La so participación nel Conseyu de Capitalidá, l’órganu qu’acompaña y asesora’l desenvolvimientu de la candidatura Uviéu 2031, refuerza’l so papel como aliaú estratéxicu na construcción d’una ciudá más abierta, creativa y conexa con Europa.
Na so intervención, Lombardía espresó l’agradecimientu pol reconocimientu y defendió la tradición como un territoriu de futuru, onde la cultura popular convive con nueves miraes, formatos y collaboraciones. La velada completóse cola interpretación de pieces de música tradicional asturiana a cargu del alumnáu de la Escuela, evocando’l la buelga del musicólogu Eduardo Martínez Torner, que da nome al premiu y simboliza’l compromisu d’Uviéu col caltenimientu y actualización del so patrimoniu inmaterial.
Con esta entrega, Uviéu vuelve a poner la cultura de raigañu nel centru del so proyeutu hacia la Capital Europea de la Cultura 2031, reconociendo a les persones que, como Lisardo Lombardía, convirtieron la tradición nuna plataforma de diálogu y proyeición internacional.
