La Vega, un corazón cultural nuevu pal Uviéu del futuru

El conceyu d’Uviéu sacó alantre’l procesu pa que l’antiguu conxuntu de la Fábrica d’Armes de La Vega dexe de ser un espaciu zarráu y aislláu y pase a integrase plenamente na ciudá. Ye una intervención estratéxica que s’allinia cola visión d’Uviéu como Capital Europea de la Cultura 2031, al poner la cultura como motor de tresformación urbana, social y económica.

La inminente constitución de la comisión de siguimientu prevista nel conveniu robláu en setiembre del 2024 ente’l conceyu, el Gobiernu d’España y el Principáu d’Asturies marca l’entamu formal d’una actuación esperada va muncho. L’oxetivu ye recuperar La Vega como un espaciu abiertu, con usos culturales, zones verdes, actividá económica y vivienda, coneutáu colos barrios de La Tenderina y Ventanielles y col bulevar de Santuyano.

Nes próximes selmanes convocaráse un concursu d’idees que definirá’l futuru del recintu, garantizando la proteición de la ilesia prerrománica de Santuyano, Patrimoniu Mundial, y la conservación de les naves de mayor valor históricu. Tirar les muries actuales va suponer un xestu simbólicu d’apertura y reconexón cola ciudá.

El proyeutu contempla una combinación d’usos que refuercia’l papel de La Vega como nuevu polu cultural. Dalgunes de les iniciatives yá tán recoyíes nel Plan Estratéxicu de la Cultura qu’acompaña la candidatura d’Uviéu 2031, como la creación d’una escuela de cine, un espaciu escénicu grande, un centru de creación contemporánea y una biblioteca central grande.

La recuperación de La Vega ye una apuesta de ciudá coherente colos valores europeos de participación, caltenibilidá y accesu a la cultura, y refuercia l’ambición d’Uviéu de ponese nel mapa cultural européu col horizonte de 2031.