La candidatura Uviéu 2031 impulsa la «amabilidá» na Uviéu CUP con un manifiestu coleutivu
La Uviéu CUP súmase a la candidatura d’Uviéu a Capital Europea de la Cultura 2031 con una aición que tresciende lo deportivo y refuerza ún de les exes del proyeutu: la «amabilidá» como valor coleutivu. Los 418 equipos participantes nel tornéu firmarán el Manifiestu pola amabilidá y el respetu nel fútbol base, nuna competición que xunta estos díes na ciudá al rodiu de 9.000 xugadores y que se convierte asina nun altavoz privilexáu pa esta iniciativa.
El direutor de la candidatura d’Uviéu 2031, Rodolfo Sánchez, destacó que l’oxetivu ye treslladar el conceutu de «amabilidá» a la ciudadanía: «Queremos qu’esti rellatu s’afite na sociedá y el fútbol base ye una oportunidá única pa facelo, porque ye tamién un ámbitu onde ye necesario reforzar estos valores». Nesti sentíu, sorrayó que la participación d’equipos de tol Estáu y de clubes internacionales permitirá ampliar l’alcuerdu del manifiestu y contribuyir a qu’esti mensaxe se conoza, s’interprete y se sienta como propiu.
L’aición forma parte de la estratexa de la candidatura pa implicar a distintos ámbitos de la vida cotidiana na construcción d’un modelu de ciudá basáu nel respetu, la convivencia y el cuidáu mutuu. Al traviés del deporte, búscase coneutar coles nueves xeneraciones y fomentar una cultura compartida que trescienda lo puramente cultural.
Mientres el tornéu, desendolcaránse diverses iniciatives venceyaes al manifiestu. El llunes 30 de marzu recibiráse a los equipos asturianos nel Palaciu de Deportes y el miércoles 1 d’abril a los equipos nacionales, alcuentros nos que xugadores de distintos equipos van lleer el testu. Amás, el domingu 5 d’abril, enantes del entamu de les finales, los neños que participen van lleer el manifiestu en direuto como símbolu de concienciación y compromisu con estos valores.
El Manifiestu pola amabilidá plantea esti conceutu como una respuesta frente a la normalización d’actitúes d’odiu y violencia na sociedá, alliniándose colos valores que promueve la candidatura. Dende’l fútbol base, defende’l respetu como principiu esencial del deporte y propón treslladalu a tolos niveles: ente compañeros, rivales, entrenadores, árbitros, families y entornu. Más allá de los xestos simbólicos, apela a un compromisu diariu col xuegu llimpiu, el cuidu de les persones y de los espacios comunes, asina como al refugu de cualesquier forma de discriminación o violencia.
