Pumarín, territoriu artísticu: arte comunitariu, cultura popular y bienestar dende’l barriu
El barriu de Pumarín acueye ente febreru y finales de mayu un programa d’arte comunitariu, cultura popular y bienestar que propón trabayar el territoriu dende la creación artística compartida, la participación xuvenil y el cuidu colectivu. El proyectu, impulsáu pol Conseyu de la Mocedá (CMU), cuenta col apoyu de la Conseyería de Salú del Principáu d’Asturies, l’Ayuntamientu d’Uviéu, l’Institutu Asturianu de la Mocedá y la candidatura d’Uviéu a Capital Europea de la Cultura 2031.
Dirixíu a xente moza d’ente 16 y 30 años, el programa concíbese como un procesu colectivu de creación, ensin necesidá de formación artística previa.
L’oxetivu ye activar un Grupu Motor —que fasta’l momentu recibió 20 solicitúes— que, a lo llargo de dellos meses, va investigar y trabayar nel barriu de Pumarín, xenerando propuestes artístiques que dialoguen coles realidaes, memories y deseos del territoriu. El proyectu parte d’una idea clara: el bienestar tamién se construye en comunidá.
El programa va arrancar con dos xornaes abiertes al públicu:
Xueves 12 de febreru, 18:30 h
Taller na Asociación Branque (Pumarín) impartíu por Dido Carrero, artista ya investigadora que conecta l’arte contemporaneu, la ciencia y la mediación cultural.
Vienres 13 de febreru, 18:00 h
Xornada pública con una conversación colectiva na que van participar Dido Carrero, Elise Florentino, Julia Sousa y La Bambi, moderada por Candela Guerrero.
A lo llargo de la sesión va tener llugar una performance de la artista La Bambi, centrada nel cuerpu, la identidá y la rellación col espaciu.
Esi mesmu vienres 13 de febreru va zarrase definitivamente’l plazu pa inscribise nesti procesu colectivu.
Ente febreru y mayu va desendolcase un ciclu de llaboratorios artísticos mensuales, acompañaos por artistes y mediadores con perfiles diversos, nos que se van esplorar llinguaxes como’l muralismu, l’audiovisual, la performance o la ilustración, siempres dende una metodoloxía participativa, situada y con enfoque de cuidu.
El procesu va concluyir a finales de mayu, con una xornada final los díes 29 y 30 de mayu, en formatu de percorríos artísticos pol barriu de Pumarín. Nesos díes van presentase les pieces, intervenciones y aiciones desendolcaes a lo llargo del proyectu como una devolución al barriu y una celebración comunitaria.
Esta iniciativa refuerza ún de los pilastres d’Uviéu2031: la cultura como ferramienta de bienestar, cohesión social y activación de los barrios, poniendo a la mocedá y a la comunidá nel centru del procesu creativu.
