¿Qué hestories guarda un llugar? ¿Qué recuerdos, cantares y voces formen parte de la so memoria colectiva? Templanza convida a les vecines y vecinos de Les Caldes y Caces a participar nun procesu de creación artística que utiliza la música como ferramienta pa descubrir, compartir y dar voz a les hestories del territoriu.

Guiáu poles artistes Ana Pereda y Antía EseUve, dientro del programa Puxa el Barriu. L’arte qu’habita, el proyectu combina mediación cultural, memoria oral y creación musical colectiva. Al traviés de distintos alcuentros y talleres, les persones participantes esplorarán los soníos, relatos y tradiciones del so entorno, creando nuevos venceyos ente persones, llugares y recuerdos.