¿Y si l’aire que compartimos se convirtiera nuna ferramienta de creación? Love is in the Air convida a les vecines y vecinos de Trubia y del so entornu a participar nun procesu artísticu colectivu nel que’l movimientu, la respiración y la comunidá se convierten nel puntu de partida de la creación.

Guiáu pola bailarina y coreógrafa Mónica García, dientro del programa Puxa el Barriu. L’arte qu’habita, el proyectu esplora la potencia transformadora del movimientu y los venceyos invisibles que xunen a les persones col territoriu. Nun fai falta experiencia previa en danza nin nes artes escéniques y pueden participar persones de toles edaes.

Al traviés de distintos talleres y alcuentros creativos, les persones participantes construirán un mapa compartíu de recuerdos, emociones y rellaciones venceyaes a Trubia y al so entornu.

Más qu’un proyectu de danza, Love is in the Air ye una invitación a escuchar, respirar y movese xuntes, descubriendo nueves formes de rellacionanos coles demás persones y colos llugares que habitamos.