Convocatories
ENTRUGUES FRECUENTES:
¿Puedo presentar más d’una propuesta?
Sí. Puedes presentar más d’una propuesta, pero como máximu va poder seleccionase una propuesta por solicitante.
¿Puedo presentar la mio propuesta anque nun resida n’Asturies?
La convocatoria ta abierta a artistes y persones creadores que vivan actualmente n’Asturies. Les residencies van desenvolvese de manera presencial nos centros educativos d’Uviéu, polo que ye recomendable que los desplazamientos nun supongan un inconveniente y que los posibles gastos derivaos d’ellos se tengan en cuenta a la hora de preparar la propuesta y el presupuestu correspondiente.
¿Puede una institución presentar una propuesta en nome del so alumnáu?
Esta convocatoria ta diseñada pa facilitar el desenvolvimientu d’un procesu creativu ente un artista o colectivu d’artistes y un centru educativu. Nel casu de que participe una institución, recomendamos que designe una persona física responsable de desenvolver esta collaboración.
Amás, cada artista tien que presentar un presupuestu detalláu de tolos costes rellacionaos cola so participación nel proyectu y namás va poder presentase una factura por artista o institución. Ye importante tener esto en cuenta nel casu de presentase al traviés d’una asociación, institución o cualquier otru organismu que pudiera tener presentaes factures anteriormente al Conceyu d’Uviéu.
¿Puedo presentar una propuesta que yá desenvolví n’otru proyectu?
Pequeñes Acciones pola Amabilidá ye un proyectu con un oxetivu mui definíu. Puedes presentar una propuesta que yá desarrollares anteriormente, teniendo en cuenta que tien d’adaptase a les característiques de la convocatoria y cumplir colos criterios de selección pa poder ser una de les 12 propuestes que se van presentar a los centros educativos.
Anguaño toi d’alta nel SEPE como persona desemplegada. ¿Puedo presentame igualmente?
Como s’indica na convocatoria, ye un requisitu indispensable tar d’alta nel réxime correspondiente de la Seguridá Social durante la execución de les actividaes, bien como autónomu o autónoma o bien como persona asalariada. El incumplimientu d’esti requisitu va suponer la esclusión automática.
La to situación nel momentu de presentar la propuesta puede ser distinta, pero al presentate comprométeste a cumplir esti requisitu pa poder desenvolver les actividaes.
¿Cómo tengo d’indicar nel presupuestu la collaboración con otru artista?
Si la propuesta ye conxunta, esto ye, si dambos artistes sois responsables y parte activa del proyectu, cada persona tien que presentar el so presupuestu por separáu na casilla correspondiente del formulariu. Cada presupuestu puede ser d’un máximu de 3.000 euros, incluyendo IVA, IRPF, honorarios y materiales, y tien que cumplir col mínimu de cinco sesiones pa poder llegar al máximu del presupuestu permitíu.
Si, pela contra, collaboras con otra persona namás como apoyu técnicu esternu —por exemplu, una persona fotógrafa encargada del rexistru, pero que nun participa na realización del taller—, esti serviciu considérase un gastu más de la propuesta. Nesti casu nun se considera una collaboración ente artistes, sinón un serviciu contratáu. Poro, l’importe total, incluyendo los tos honorarios y el coste del apoyu esternu, tien que quedar recoyíu nuna única factura y nun puede superar el llímite global de 3.000 euros.