El Conceyu d’Uviéu pon en marcha per primer vegada una llinia d’ayudes de 200.000 euros pa la creación y producción artística
El Conceyu d’Uviéu, al traviés de la Fundación Municipal de Cultura, pon en marcha per primer vegada una convocatoria de subvenciones destinada al fomentu de la creación y la producción artística, con una dotación total de 200.000 euros.
La iniciativa, publicada esti miércoles nel Boletín Oficial del Principáu d’Asturies (BOPA), supón la puesta en marcha d’una de les acciones recoyíes nel Plan Estratéxicu de Cultura d’Uviéu (PECO 2035), dientro de la so llinia estratéxica dedicada al impulsu de la creación y la producción artística y al fortalecimientu del sector cultural local.
L’oxetivu d’estes ayudes ye sofitar económicamente proyectos singulares d’interés xeneral, favorecer l’apaición de nueves propuestes y contribuyir al crecimientu d’un texíu cultural más diversu y dinámicu, con especial atención al talentu emerxente.
La convocatoria ta dirixida a persones físiques, persones xurídiques y entidaes ensin ánimu de llucru venceyaes al ámbitu cultural que desarrollen la so actividá o cuenten con una trayectoria profesional relacionada, polo menos, col conceyu d’Uviéu. Tamién van poder presentase profesionales ensin una trayectoria previa nel conceyu cuando los sos proyectos tengan una especial relación cola cultura uvieína.
Les ayudes van concedese en réxime de concurrencia competitiva y cuenten con un presupuestu global de 200.000 euros, con cargu a la Fundación Municipal de Cultura.
El plazu de presentación de solicitúes va ser de 20 díes naturales a partir del día siguiente a la publicación de la convocatoria nel BOPA y va permanecer abiertu hasta’l próximu 22 de setiembre.
La información completa y les bases de la convocatoria pueden consultase na Base de Datos Nacional de Subvenciones. La solicitú y la documentación necesaria van tar disponibles tamién na Sede Electrónica del Conceyu d’Uviéu y tendrán que presentase al traviés del Rexistru Electrónicu, dirixíes a la Fundación Municipal de Cultura.
Con esta nueva llinia d’ayudes, el Conceyu incorpora una ferramienta específica de sofitu económicu a la creación y producción artística orientada a facilitar el desarrollu de proyectos y xenerar nueves oportunidaes pa artistes, creadores y axentes culturales.
La puesta en marcha d’estes ayudes supón, amás, un pasu nuevu nel desarrollu del PECO 2035 y refuerza’l trabayu que Uviéu vien desarrollando nel marcu de la so candidatura a Capital Europea de la Cultura 2031, especialmente no relativo al sofitu al texíu creativu local y a la consolidación d’unes polítiques culturales capaces de dexar impactu más allá del propiu procesu de candidatura.
Más información y solicitúes
- Bases completes de la convocatoria: https://www.infosubvenciones.es/bdnstrans/GE/es/convocatoria/926572
- Sede Electrónica del Conceyu d’Uviéu: https://sede.oviedo.es
- Rexistru Electrónicu pa presentar la solicitú: https://sede.oviedo.es/servicios/registro-electronico
