Vuelve Puxa el Barrio con nueves propuestes y residencies que siguen el so percorríu

Puxa el Barrio, el programa de participación y creación comunitaria del Conceyu d’Uviéu impulsáu por Uviéu 2031, retoma la so actividá esti seronda con nueves residencies y cola continuación de dellos procesos entamaos primero del branu.

Ente les nueves propuestes ta Xuntanza, que se desarrolla en La Manxoya de la mano de Mono Escena y la Escuela Municipal de Sostenibilidá. El proyectu utiliza’l teatru y la creación comunitaria pa trabayar sobre la memoria de l’antigua fábrica d’esplosivos d’El Fulminato y la so relación col territoriu, el paisaxe y la sostenibilidá. El procesu va rematar con un paséu teatralizáu construyíu a partir de recuerdos, testimonios y materiales apurríos pola comunidá.

Tamién empieza Dónde no imaginas, coordináu por LluPA ACTS. La propuesta va desarrollase n’El Cristo II y Villa Magdalena y va combinar diseñu, ilustración y paisaxe sonoru pa esplorar histories, recuerdos y detalles de los espacios cotidianos que davezu pasen desapercibíos.

Sigue amás Huellas, de les fotógrafes Irma Collín y Ainhoa Valle, n’El Cortijo y Buenavista. Al traviés de fotografíes y archivos familiares, el proyectu trabaya sobre la memoria, la identidá y el sentimientu de pertenencia. La residencia va rematar con dos esposiciones nel espaciu públicu, una en cada barriu.

En Trubia sigue tamién Love is in the Air, una residencia de la baillarina y coreógrafa Mónica García que utiliza la danza y el movimientu como ferramientes d’alcuentru y creación colectiva. El proyectu va rematar con una intervención de danza nes cais de Trubia y les inscripciones siguen abiertes pa les persones que quieran sumase.

Puxa el Barrio forma parte de la estratexa de participación d’Uviéu 2031 y propón construyir cultura dende los barrios, implicando a artistes y comunidaes en procesos de creación compartida al traviés de disciplines como la fotografía, la danza, el teatru, el diseñu o’l paisaxe sonoru.