Uviéu impulsa la tresformación de La Vega con un concursu internacional d’idees

Uviéu da un pasu más na recuperación del recintu de l’antigua fábrica d’armes de La Vega, un espaciu clave pal desarrollu cultural y urbanu de la ciudá nel horizonte del 2031.

La Xunta de Gobiernu aprobó la convocatoria d’un concursu internacional d’idees que va permitir definir el futuru d’esti enclave históricu y la so integración nel espaciu urbanu. El certame va cuntar con una dotación de 80.000 euros en premios y busca atrayer propuestes d’estudios d’arquiteutura y urbanismu de referencia.

L’equipu ganador va ser l’encargáu de redactar el proyeutu definitivu, qu’incluyirá la ordenación urbanística y los instrumentos necesarios pa tresformar La Vega nun espaciu abiertu, accesible y coneutáu cola ciudá. El calendariu prevé qu’esti documentu tea fechu a entamos del 2027.

La intervención plantea un modelu d’usos mestos que combine cultura, anovamientu, actividá económica, zones verdes y vivienda, col oxetivu de xenerar un espaciu d’alcuentru nuevu pa la ciudadanía.

Amás, el proyeutu deberá respetar el valor patrimonial del entornu, incluyendo la cercanía de Santuyano y los caminos históricos que crucien la zona, reforzando la so integración nel paisaxe urbanu y cultural d’Uviéu.

Con esta iniciativa, la ciudá avanza na recuperación d’unu de los sos espacios más emblemáticos, alliniando la so tresformación colos valores de caltenimientu, convivencia y accesu a la cultura que definen la candidatura d’Uviéu a Capital Europea de la Cultura 2031.