Uviéu da’l pistoletazu de salida a SACO con más de 600 escolares nel Teatru Filarmónica
El Teatru Filarmónica entama güei con fuercia una edición nueva de SACO –Selmana del Audiovisual Contemporaneu d’Uviéu–, xuntando a más de 600 neños, neñes y profesoráu de centros educativos de la ciudá na so xornada inaugural.
L’entamu d’esta cita cultural non solo marca l’aniciu de la programación, sinón tamién el d’una esperiencia compartida que, nes próximes selmanes, averará’l cine y l’audiovisual contemporaneu a más de 8.000 alumnos y alumnes de colexos d’Uviéu.
Mientres la presentación, representantes institucionales y culturales destacaron la dimensión educativa del proyeutu. Lourdes García, conceyala d’Educación del Conceyu d’Uviéu; Sabrina Clemente, direutora de l’Alianza Francesa d’Uviéu; y Zoe López, coordinadora territorial de la candidatura Uviéu 2031, acompañaron esti entamu que pon el focu nel públicu más mozo.
Zoe López sorrayó que «el públicu infantil ye la futura audiencia del proyeutu Uviéu 2031» y destacó que «la educación, la participación y el voluntariáu son facetes mui importantes d’una candidatura a Capital Europea de la Cultura».
Amás, señaló que «vamos potenciar programes como SACO y munchos otros que representen la vixencia de la vida cultural d’Uviéu, partiendo del talentu qu’avera la cultura a tolos públicos», insistiendo na importancia de «una visión interxeneracional como exa estratéxica del proyeutu».
Hasta’l próximu 8 de mayu, el Teatru Filarmónica acoyerá un total de 22 sesiones dirixíes al públicu escolar, afitando SACO como una de les propuestes culturales y educatives más relevantes del calendariu llocal.
