Uviéu aprueba’l Plan Estratéxicu de Cultura 2025–2035, una fuelga de ruta clave pa la candidatura a Capital Europea de la Cultura
El Conseyu Rector de la Fundación Municipal de Cultura aprobó esti llunes, por unanimidá de tolos miembros presentes —el grupu Vox nun asistió a la sesión—, el Plan Estratéxicu de Cultura d’Uviéu 2025–2035 (PECO 2035). El documentu marca les llinies principales de la política cultural del conceyu pa la próxima década y conviértese nuna ferramienta fundamental pa reforzar la candidatura d’Uviéu a Capital Europea de la Cultura 2031.
El plan foi ellaboráu pol equipu d’Uviéu 2031 en collaboración cola Fundación Kreanta, una entidá de referencia na planificación cultural y nel desarrollu urbanu. El resultáu supone un puntu d’inflexón na estrategia cultural de la ciudá y abre una etapa nueva centrada na innovación, la participación y la tresformación social.
Los grupos municipales tuvieron una participación activa nel procesu de redacción, entamando xuntes tantu col equipu de la candidatura como col personal téunicu de Kreanta. Dende’l principiu se trabayó col envís de llograr un documentu de consensu que garantizara la so continuidá y aplicación nel llargu plazu. El direutor d’Uviéu 2031, Rodolfo Sánchez, destacó la intensidá del trabayu y afirmó: “Ye de xusticia reconocer l’esfuerzu que fixo’l nuesu equipu, encabezáu pa esti cometíu pol coordinador, Pepe Mompeán, pola coordinadora territorial, Zoe López, y por tol personal de la Fundación Kreanta, que foi quien a construyir nun tiempu récord un gran plan de futuru pa la cultura n’Uviéu.”
El PECO 2035 naz d’un ampliu procesu participativu que integró les aportaciones d’agentes culturales, ciudadanía, instituciones y espertos. El documentu da respuesta a les necesidaes detectaes nesta fase d’escucha activa y asitia les bases pa una renovación fonda del texíu cultural uvietín. Concibe la cultura como un derechu fundamental que tien de garantizase a tol mundu, con independencia del so orixe, situación económica, edá, xéneru o capacidaes, y reconóz el so papel como motor de cohesión social y bienestar.
El plan plantega una visión integral y transversal que coneuta l’aición cultural con toles estayes del gobiernu municipal, poniendo nel centru el desarrollu de los drechos culturales. Amás, entiende la participación ciudadana como un procesu abiertu y continuu, en diálogu permanente colos axentes locales.
Ún de los pilares del documentu ye la so estrategia d’equipamientos, destinada a optimizar los recursos esistentes y ampliarlos con nueves infraestructures. Entre los proyeutos más destacaos tán la futura Casa de les Artes y les intervenciones previstes na antigua fábrica d’armes de La Vega, onde se proyeuten una biblioteca central nueva, un espaciu escénicu, una escuela de cine y un centru de creación contemporánea con área espositiva.
El PECO 2035 define un modelu cultural contemporaneu, participativu y sostenible que reforcia la gobernanza del sector, impulsa la creación artística y el crecimientu del texíu local, promueve una vida cultural accesible e inclusiva y asitia la diversidá como un valor estratéxicu. El documentu reconoz tamién la rellación ente cultura y desarrollu urbanu sostenible, destacando’l papel de les biblioteques como espacios de cercanía, la vinculación ente cultura y educación, la participación infantil y xuvenil, la implicación de les persones mayores y la integración ente lo urbanu y lo rural como señes esenciales de la identidá del conceyu.
Amás, el plan aposta por potenciar el patrimoniu cultural y el paisaxe como ejes de desarrollu, garantizando la so proteición y usu responsable en beneficiu de la comunidá y de les xeneraciones futures. El so modelu de xestión abarca’l patrimoniu monumental, l’inmaterial y la cultura rural, consideraos recursos fundamentales pa la proyección y singularidá d’Uviéu.
Magar que la candidatura a Capital Europea de la Cultura va actuar como catalizador de munchos d’estos procesos, el PECO 2035 concíbese como un proyeutu de llargu percorríu que tresciende 2031 y que busca consolidar la cultura como ún de los grandes motores estratéxicos d’Uviéu na próxima década.
Cola so aprobación, la ciudá dotase d’una visión cultural sólida y compartida que combina tradición, innovación y participación ciudadana pa construyir un futuru más creativu, cohesionado y sostenible.
