Uviéu 2031 participa na 17ª Conferencia de Culture Next en Finlandia

Uviéu 2031 tuvo presente na 17ª Conferencia de Culture Next, celebrada n’Oulu (Finlandia), Capital Europea de la Cultura 2026. Antonia Blau, integrante del equipu de la candidatura, asistió a esti alcuentru internacional qu’axunta a representantes de distintes ciudaes europees pa intercambiar esperiencies, compartir conocimientos y esplorar nueves oportunidaes de collaboración.

La conferencia xiró alredor de la rellación ente la cultura y los Oxetivos de Desenvolvimientu Sostenible (ODS), con especial atención a cómo treslladar estos compromisos a les polítiques culturales y a proyectos concretos. Al traviés de conferencies, meses d’alderique y presentaciones d’iniciatives, les persones participantes reflexonaron sobre’l papel de la cultura na tresformación social, la sostenibilidá y el desenvolvimientu de les ciudaes.

El programa permitió tamién conocer dalgunes de les iniciatives impulsaes por Oulu 2026, poniendo especial atención nel legáu cultural y na continuidá de los proyectos más allá del añu de la capitalidá. Amás, incluyó una xornada de trabayu de la rede Culture Next na isla de Hailuoto, destinada a favorecer l’intercambiu d’esperiencies y la cooperación ente ciudaes.

La presencia d’Uviéu 2031 nesti alcuentru forma parte de la so apuesta pola dimensión europea de la candidatura y pola creación de vínculos con otres ciudaes que comparten retos culturales y sociales. Una oportunidá p’aprender d’otres esperiencies, establecer conexones y siguir construyendo un proyectu que pon la cultura, la participación y la cooperación nel centru de la so propuesta.