Uviéu 2031 entrega’l so dosier definitivu y comparte’l proyectu cola comunidá cultural asturiana
La candidatura d’Uviéu a Capital Europea de la Cultura 2031 dio un pasu decisivu cola entrega del so dosier definitivu al Ministeriu de Cultura’l pasáu 3 de payares. El documentu recueye’l proyectu cultural col que Uviéu aspira a consiguir el títulu européu en 2031, baxo’l lema Amabilidá. Escoyer la utopía.
La entrega marca l’entamu de la última fase del procesu de selección, que’l so resultáu va conocese n’avientu. El dosier amplía y desenvuelve la propuesta presentada na primer fase, afondando nel programa artísticu, la dimensión europea, la participación ciudadana, el modelu de xestión y la financiación.
El proyectu ye frutu d’un ampliu procesu d’escucha y trabayu colectivu nel que participaron más de 1.000 persones, con más de 200 entrevistes y cerca d’un centenar d’alcuentros. Una candidatura que tresciende les llendes d’Uviéu pa convertise nuna propuesta compartida col conxuntu d’Asturies, los sos axentes culturales, instituciones y ciudadanía.
La xornada del 3 de payares acabó en Kuivi Almacenes, onde l’equipu d’Uviéu 2031 axuntó a artistes, profesionales de la cultura, representantes institucionales y persones venceyaes a la candidatura pa compartir esti nuevu finxu y agradecer la so implicación nel proyectu.
L’alcuentru contó coles intervenciones de Rodolfo Sánchez Farpón, director d’Uviéu 2031, y Zoe López Mediero, y Paula Mota codirectoras artístiques, que punxeron en valor el trabayu desenvueltu nos últimos meses y la contribución de toles persones y entidaes qu’ayudaron a dar forma a la propuesta.
La xornada incluyó tamién una intervención de Lofacil y acabó con un espaciu informal d’alcuentru, acompañáu pola música de la DJ María Mieres, qu’axuntó a bona parte de la comunidá cultural implicada nel proyectu.
La propuesta definitiva d’Uviéu 2031 asitia la Amabilidá nel centru de la so visión cultural: una manera d’entender la convivencia dende la escucha, el cuidáu, el diálogu y la collaboración. Cola invitación a Escoyer la utopía, la candidatura plantega la cultura como una ferramienta pa imaxinar y construyir formes nueves de vivir xuntos.
La tresformación de la Fábrica de Armas de La Vega, ún de los espacios más emblemáticos de la memoria industrial d’Uviéu, representa esta voluntá de cambéu: convertir una antigua fábrica d’armes nun espaciu abiertu a la cultura, la creación, la conocencia y l’alcuentru ciudadanu.
Col dosier definitivu yá entregáu, Uviéu 2031 encara la última etapa de la candidatura xunto a les otres trés ciudaes finalistes: Cáceres, Granada y Las Palmas de Gran Canaria. Más allá del resultáu, el proyectu aspira a dexar un llegáu duraderu pa Uviéu y Asturies, fortaleciendo’l so texíu cultural, la participación ciudadana y los sos vínculos con Europa.
