Uviéu 2031 lleva la Amabilidá a Bruxeles y refuerza los sos vínculos culturales con Europa
La candidatura d’Uviéu a Capital Europea de la Cultura 2031 celebró’l pasáu 5 de payares un alcuentru en Bruxeles cola comunidá asturiana residente en Bélxica pa dar a conocer el so proyectu cultural y reforzar los vínculos ente Asturies y Europa.
L’actu tuvo llugar en La Tricoterie, una antigua fábrica de muebles reconvertida n’espaciu cultural, un exemplu de recuperación del patrimoniu industrial que conecta con ún de los grandes oxetivos d’Uviéu 2031: la tresformación de la Fábrica de Armas de La Vega nun llugar dedicáu a la cultura, la creación y l’alcuentru ciudadanu.
Durante la xornada, l’equipu de la candidatura presentó les llinies principales de la so propuesta, que’l so dosier definitivu foi entregáu’l pasáu 3 de payares al Ministeriu de Cultura, baxo’l lema Amabilidá. Escoyer la utopía. El proyectu plantega la cultura como una ferramienta pa fortalecer la convivencia, impulsar la cooperación europea y encarar los desafíos de futuru dende la participación, el diálogu y la creación colectiva.
L’alcuentru contó cola participación de Zoe López Mediero y Paula Mota García, codirectores artístiques d’Uviéu 2031, y Antonia Blau, responsable de Dimensión Europea, qu’abordaron la proyección internacional de la candidatura, les sos conexiones con otres ciudaes y axentes culturales europeos y el papel de la cultura como motor de tresformación social.
Ún de los momentos destacaos de la xornada foi la proyección d’un fragmentu de La revuelta y la nieve, del artista xixonés Dionisio González. Esti ensayu audiovisual esplora la memoria minera d’Asturies y les tresformaciones sociales y llaborales de les cuenques mineres, al empar que convida a reflexonar sobre les nueves oportunidaes qu’ufierten los antiguos espacios industriales venceyaes a la tecnoloxía, la innovación y la cultura.
La conversación permitió tamién afondar nel significáu de Amabilidá, el conceptu qu’articula la candidatura y que propón una manera d’entender la convivencia basada na escucha, el cuidáu y la collaboración. El lema Escoyer la utopía amplía esta visión y proyéctala hacia Europa como una invitación a imaxinar futuros meyores y construyilos colectivamente al traviés de la cultura.
L’alcuentru celebróse en collaboración con La Nueva España, qu’aprovechó la ocasión pa presentar Asturias Exterior, una plataforma dixital destinada a conectar a la comunidá asturiana repartida pel mundu, dar visibilidá a les sos histories y caltener vivos los vínculos cola so tierra d’orixe. La presentación corrió al cargu de Eduardo Lagar, responsable del proyectu.
La xornada incluyó un espaciu d’entrugues y respuestes nel que les persones asistentes pudieron conocer con más detalle la candidatura ya intercambiar impresiones col so equipu. L’alcuentru acabó con un cóctel informal amenizáu pola música de BPM Express, que favoreció’l diálogu y l’acercamientu ente la comunidá asturiana en Bélxica y los representantes d’Uviéu 2031.
Con esta iniciativa, Uviéu 2031 sigue reforzando la so dimensión europea y tendiendo pontes ente Asturies y les comunidaes asturianes nel esterior, na recta final del procesu de selección de la Capital Europea de la Cultura 2031.
