Artistes, dinamizadores y programadores culturales xúntense en Les Regueres pa reforzar el mediu rural asturianu

L’axencia de comunicación MelodijoPérez, asentada en Les Regueres, foi escenariu de la primer mesa sectorial nel territoriu rural. Cola escusa de la candidatura d’Uviéu a Capital Europea de la Cultura 2031, xuntáronse ellí artistes visuales, dinamizadores y programadores culturales comprometíos col mundu rural.

L’oxetivu d’estos alcuentros ye fomentar la creación de proyeutos con que dexen un posu duraderu que tresciendan la celebración de la Capitalidá y que xeneren conteníu pal ámbitu rural, favoreciendo que seya’l mesmu territoriu’l que xenere emplegu y oportunidaes. La identidá cultural preséntase como un proyeutu clave de rexeneración, y estes xuntes constitúin una oportunidá perguapa pa reforzar redes de collaboración y trabayar conxuntamente.

Una de les carauterístiques que distingue’l territoriu asturianu ye la so riqueza cultural. Amás, la participación de la muyer nel mediu rural foi fundamental tanto na tresmisión de la cultura como nel caltenimientu de les tradiciones, desempeñando un papel esencial na conservación del patrimoniu..