La Orquesta Oviedo Filarmonía abre’l ciclu de presentaciones culturales nel stand d’Oviedo Capital Europea de la Cultura na FIDMA, cola presentación de la so temporada nueva

La Orquesta Oviedo Filarmonía foi la encargada d’abrir el ciclu de presentaciones culturales del stand d’Oviedo na Feria Internacional de Muestras d’Asturies (FIDMA), dedicáu esti añu a la candidatura a Capital Europea de la Cultura 2031.

La conceyala de Festexos, Centros Sociales y Mocedá, Covadonga Díaz, presentó l’actu, nel que tamién intervinieron la presidenta de la Fundación Musical Ciudá d’Oviedo, Pilar Rubiera, y el direutor artísticu, Cosme Marina. L’eventu acompañóse cola interpretación d’un cuartetu de la orquesta.

Pilar Rubiera recordó que 2025 ye un añu clave pa la candidatura d’Oviedo a la capitalidá cultural y destacó que la ciudá ta trabayando xunto con otros conceyos asturianos “pa amosar a Europa y al mundu que somos un territoriu pequeñu, pero con una gran personalidá paisaxística, histórica, cultural y social”. Soblinié que Oviedo “ta orgullosa de la so historia y de la so tradición cultural y musical, y de la so conexón secolar coles grandes capitales europees”.

Cosme Marina destacó la importancia de la música na identidá europea y anunció que la temporada nueva de los Conciertos del Auditorio y les Xornaes de Piano Luis G. Iberni va tener “una clara vocación europea”. Ente’l 29 d’ochobre de 2025 y el 4 de xunu de 2026, l’Auditoriu Príncipe Felipe acoyerá 18 actuaciones d’artistes como Zubin Mehta, Yuja Wang, William Christie, Jakub Orlinski o Pinchas Zukerman, nuna programación que va abrir y zarrar la Oviedo Filarmonía.