El stand del Conceyu d’Uviéu na Feria de Muestras recibió más de 42.000 visites

Los casi 100 metros del stand del Conceyu d’Uviéu na Feria de Muestras d’Asturies recibieron nesta edición daqué más de 42.000 visites dende la so apertura al públicu, concretamente 42.257 visites. El stand d’Uviéu, que nesta ocasión tuvo íntegramente dedicáu al proyectu de Capitalidá Europea de la Cultura 2031, recibió miles de visites que pudieron participar na encuesta interactiva habilitada pa que la ciudadanía pudiera aportar suxerencies y meyores na programación cultural de la ciudá. En total rexistráronse 11.376 encuestes, amás de casi 600 vídeos de sofitu a la candidatura d’Uviéu a esti reconocimientu européu.

El stand albergó cada día presentaciones de les fortaleses culturales y identitaries de la ciudá pa concurrir a esti procesu, como’l ciclu de Conciertos del Auditoriu o les Xornaes de Piano, la programación añal de la OFIL, la Temporada d’Ópera, los conciertos de San Mateo, el programa del Desarme, les actividaes culturales del últimu cuatrimestre del añu o’l Festival LINK, que va abrir les sos puertes l’últimu fin de selmana d’agostu. El stand d’Uviéu recibió la visita, amás, de diverses instituciones, como la Cruz Roja, l’Uviéu Balonmano y representantes del gobiernu autonómicu, amás del presidente del Executivu asturianu, Adrián Barbón, que tamién quixo dexar constancia del so firme compromisu cola capitalidá cultural d’Uviéu con un vídeu de sofitu.

El día grande foi’l pasáu sábadu 16 d’agostu, cola celebración del Día d’Uviéu, na que participó una comitiva de la corporación municipal, cola participación de tolos grupos políticos, encabezada pol regidor Alfredo Canteli.