Ventanielles celebró’l I Festival Mozu de mano de l’Asociación Luar
L’Asociación Luar, entidá ensin ánimu d’arriquecimientu del barriu uvieín de Ventanielles, celebró esti fin de selmana’l I Festival Mozu, «Suañando Mocedá», una cita gratuita protagonizada pola mocedá qu’enllenó de música y bona enerxía les cais del barriu en plenes fiestes de San Matéu.
Fundada en 2015, Luar trabaya pa menguar la desigualdá d’oportunidaes qu’afeuta a mozos y moces de 16 a 35 años en situación d’esclusión social. Cada añu acompaña a unes 600 persones moces en situación de vulnerabilidá y, amás, anguaño ta impulsando la creación d’un teatru de barriu, un espaciu nuevu comunitariu pal arte y la cultura.
El festival «Suañando Mocedá» presentóse como un metaproyeutu d’artes escéniques y plástiques que xuntó a más de 30 artistes emerxentes d’Asturies en diferentes disciplines y formatos. El so oxetivu: ufiertar un espaciu d’ociu seguru, saludable y de baldre pa la mocedá d’Uviéu y pa toles persones que visitaron la ciudá nestes feches festives.
El programa, diseñáu de manera participativa pola propia mocedá del barriu, incluyó actividaes como un karaoke popular, un freetour per Ventanielles que guiaben los mozos de l’asociación, muralismu coleutivu, conciertos, sesiones de DJ o un tornéu de freestyle, ente otres propuestes que fixeron d’esti fin de selmana un tiempu de creatividá y alcuentru.
La esencia del festival nun ta namás no que se pudo disfrutar, sinón tamién en cómo se preparó: dende la collaboración, la pertenencia y la participación. Esta iniciativa refuerza la importancia, dientro de la candidatura d’Uviéu a Capital Europea de la Cultura, de crear aliances con proyeutos que representen la fuercia creativa con impautu social de la ciudá, dando reconocimientu y visibilidá a les propuestes que meyoren y arriquezan la vida de los neños, neñes y mozos que participen nelles.
El I Festival Mozu conviértese asina n’un primer pasu p’afitar a Ventanielles como un referente de cultura comunitaria y mocedá n’Uviéu, onde la cultura s’entiende como ferramienta de tresformación y empoderamientu social.
