Uviéu celebra la decimotercer edición de la Nueche Blanca cola mirada puesta na Capitalidá Europea de la Cultura 2031
El próximu sábadu 4 d’ochobre de 2025, Uviéu acoyerá la decimotercer edición de la Nueche Blanca, una de les sos cites culturales más esperaes y, al empar, un escaparate perfeutu del espíritu que da sentíu a la candidatura a Capital Europea de la Cultura 2031.
A lo llargo d’once hores —de les 17:00 h a les 3:00 h— la ciudá va tresformase nuna gran escena cultural con más de 40 actividaes de baldre. La programación amuesa la capacidá d’Uviéu p’abrise a Europa, apostar pol anovamientu artísticu y facer de la cultura un espaciu compartíu pa tola ciudadanía.
La Nueche Blanca, nacida en París a principios d’esti sieglu y espardida darréu per Europa, yá ye un movimientu cultural internacional qu’Uviéu fai de so con personalidá propia.
Nesta edición, la capital asturiana refuerza la so dimensión europea, acoyendo creadores de distintos países y fomentando intercambeos que tamién van permitir a los artistes llocales participar n’otres Nueches Blanques del continente.
“Toles actividaes son de baldre y, al traviés d’esta programación multidisciplinar, vanguardista ya anovadora, intentamos alternar lo artístico colo llúdico y lo educativo”, esplica José Castellano, coordinador de la Nueche Blanca.
El programa inclúi instalaciones llumíniques, esperiencies de realidá aumentada, música clásica y contemporánea, lliteratura, artes plástiques, artes escéniques, patrimoniu, performances y jam sessions. Too ello n’espacios cargaos de simbolismu como la Fábrica d’Armes de La Vega, Les Pelayes o l’Edificiu Históricu de la Universidá, a los que se sumen esti añu’l renováu Palaciu de los Deportes y l’antigua cárcel, que va acoyer una jam session.
Destaca l’alcuentru ente Edu Galán y Álex de la Iglesia nel Teatru Filarmónica, la música contemporánea en Trescorrales, l’apuesta de Kuivi Almacenes poles manifestaciones más alternatives y la esposición de Chillida na sala Sabadell (aforu llendáu).
La Nueche Blanca confirma qu’Uviéu ye una ciudá que respeta les sos raíces, pero que s’abre a lo nuevo con vocación europea. Cada edición ye un exerciciu d’identidá compartida y una demostración de la creatividá, l’ambición y el talentu que sofiten la candidatura d’Uviéu a Capital Europea de la Cultura en 2031.
Más información y programación detallada en www.nocheblanca.es y nes redes sociales de Cultura Uviéu.
