Artístiques enllena’l Kuivi nuna nueche de talentu asturianu y gran acoyida del públicu

Los Almacenes Kuivi d’Uviéu nun fueron a llevar la xente la nueche del sábadu na celebración d’Artístiques, el festival entamáu por Puru Remangu y Ixuxú Cultura, que llogró una presencia de públicu bien destacada.

L’alcuentru comenzó a les 19.00 hores cola creación en vivo de delles obres sobre llenzu, un procesu qu’atraxo a decenes d’asistentes dende los primeros minutos. Les artistes María Ortiz, Luzia Pedregal, Iratxe Esteve, Juls, Inés Benito, Clara Nieto, Celia Pandiella y Dido Carrero, xunto coles estudiantes de la Escuela Superior d’Arte del Principáu Raquel Mañana y de la Escuela d’Arte d’Uviéu Lucía Álvarez, trabayaron énte’l públicu a lo llargo de más de dos hores. Una vegada terminaes, los autores presentaron les sos pieces y punxéronles a la venta.

A les 20.00 hores llegó’l turnu de les artes escéniques, col estrenu de cuatro pieces n’asturianu. Les propuestes, diverses en tonu y temática, tresformaron l’espaciu nun pequeñu llaboratoriu de creación contemporánea.

A partir de les 21.30 hores, la programación dio pasu a la música cola Muestra d’Asturianada Electrónique, que volvió a demostrar la so capacidá pa sorprender y coneutar col repertoriu tradicional dende una mirada actual. Pel escenariu pasaron les cantadores Alicia Villanueva y Lucía Rojo; les escritores Blanca Fernández, Marina Pangua y Ánxela Gómez d’Ávila; la DJ Lidia Friera; l’artista gallega Catuxa Salom y la creadora vasca Süne, amás del tríu Rellume, que punxo’l colofón final a una nueche marcada pola enerxía y la esperimentación.

Artístiques, d’accesu de baldre, contó col sofitu de la Conseyería de Cultura del Principáu, del Institutu de la Mocedá d’España y col patrociniu de Caxa Rural, y peslló la so edición dexando claro que’l talentu mozo y la creación asturiana tán non solo en bona forma, sinón nun momentu de plenu ruxerrux artísticu.