Cultura y comerciu llocal xúnense nuna nueva campaña venceyada a la candidatura Uviéu 2031

Doscientos comercios d’Uviéu van repartir dende mañana xueves postales ilustraes por cinco artistes llocales dientro de la campaña Por amor al arte.

Les ilustraciones, realizaes por Cecilia Díaz, Andrea V. Franceschi, Verónica Grech, Laura Lara y Celia Pandiella, inviten a mirar l’amor dende distintes perspeutives. Al traviés de les sos propuestes, les artistes aborden temes como l’amistá, la diversidá, l’amor propiu, l’amor adultu, les emociones, el venceyu colos animales o los afeutos cotidianos, tresmitiendo mensaxes de respetu, tolerancia y celebración de les distintes formes de querese.

Les obres, comisariaes pol equipu de la candidatura, refuercien la idea de l’amabilidá como forma de rellacionanos y ponen en valor el papel de la creación contemporánea na vida diaria, averando l’arte a los espacios cotidianos de la ciudá. Cada postal incluye, amás, una declaración d’intenciones que resume l’espíritu del proyeutu: «Amabilidá tamién ye una forma d’amar».

La iniciativa contribuye a integrar el pequeñu comerciu como un actor fundamental na vida cultural d’Uviéu, faciendo que la creación artística circule peles cais, los barrios y los llugares onde trescurre la vida cotidiana. Al mesmu tiempu, la campaña da visibilidá a la candidatura d’Uviéu a Capital Europea de la Cultura 2031, que promueve una visión de la cultura cercana, participativa y presente nel día a día.

Dende la organización agradecióse la implicación de los comercios participantes, de les asociaciones comerciales y de les artistes, animando a la ciudadanía a sumase a la iniciativa y a sofitar el comerciu llocal.