Diez artistes asturianes protagonicen la esposición final del proyeutu Artístiques n’Uviéu
El proyeutu Artístiques, que’l pasáu payares axuntó a más de cuarenta creadores nuna xornada d’artes escéniques, música y artes plástiques n’Almacenes Kuivi, continúa agora con una esposición coleutiva en Komono Gallery, asitiada nel cascu históricu de la ciudá.
La muestra xunta obres de Dido Carrero, Jools, Celia Pandiella, Luzia Pedregal, Lucía Álvarez, Clara Nieto, Raquel Mañana, Inés Benito, María Ortiz y Iraxe Esteve, una seleición de nueves creadores venceyaes al panorama artísticu asturianu. Munches de les pieces fueron realizaes en direuto nel festival celebráu en payares y reflexen distintes aproximaciones a la pintura y a les artes plástiques contemporánees.
La esposición funciona como pieslle del procesu creativu entamáu nel festival, una iniciativa que xuntó a cerca de cuarenta artistes y que punxo en diálogu disciplines artístiques diverses baxo un enfoque que combina creación contemporánea, feminismu y llingua asturiana.
El proyeutu ta impulsáu pola marca asturiana Puru Remangu y pola promotora cultural Ixuxú Cultura, col oxetivu de dar visibilidá al talentu mozo femenín y xenerar espacios d’alcuentru ente distintes disciplines artístiques. La iniciativa cuenta col sofitu de la Conseyería de Cultura del Principáu d’Asturies y del Instituto de la Juventud de España (INJUVE), amás del patrociniu de Caxa Rural d’Asturies.
Proyeutos como Artístiques contribuyen a reforciar l’ecosistema cultural contemporaneu d’Uviéu, creando oportunidaes p’artistes emerxentes y fomentando’l diálogu ente disciplines y comunidaes creatives. Iniciatives d’esti tipu reflexen tamién la vitalidá cultural de la ciudá y la so apuesta por asitiar la cultura nel centru del desarrollu urbanu, una de les llinies de trabayu de la candidatura d’Uviéu Capital Europea de la Cultura 2031.
La esposición podrá visitase nes próximes selmanes en Komono Gallery, ufriendo al públicu la oportunidá de descubrir nueves voces del arte contemporaneu n’Asturies.
