LABoral abre una etapa nueva cola so programación pa 2026

LABoral Centru d’Arte y Creación Industrial presentó la so programación añal. Pa la so recién estrenada direutora, Semíramis González, l’actu supunxo una declaración pública d’intenciones dempués de meses de trabayu internu y el primer xestu visible d’un rumbu nuevu que mira al futuru ensin arrrenunciar al espíritu fundacional del centru.

González quixo rodease de socios, collaboradores y axentes culturales nuna amplia «semeya de familia» que xuntó a programadores de Xixón y Uviéu, galeristes, representantes institucionales, responsables de la Escuela d’Arte d’Uviéu y de la Universidá d’Uviéu, amás d’artistes, músicos, comisarios y profesionales del ámbitu audiovisual y de la escena contemporánea. L’actu contó tamién cola presencia del equipu d’Uviéu 2031, atentu a una programación que refuercia la posición d’Asturies nos circuitos culturales nacionales y europeos, una imaxe que nun pasó desapercibida y que foi destacada al entamu del autu pol direutor xeneral de Cultura del Principáu, Pablo León.

La direutora faló del deséu de «volver a ser» la LABoral de los sos primeros años: un referente del arte contemporaneu a nivel estatal. El programa de 2026 da continuidá a iniciatives impulsaes pol equipu anterior —«tolo que funciona tien de siguir funcionando»—, pero amplía de mou decidíu les aliances institucionales y culturales. Refuérciase la collaboración col Conceyu de Xixón, l’Autoridá Portuaria de Xixón, la Escuela d’Arte d’Uviéu y la Universidá d’Uviéu, y afítase una rede de cooperación con instituciones nacionales ya internacionales como CentroCentro (Madrid), el Muséu Reina Sofía, el Thyssen-Bornemisza, Tabacalera o iMAL (Bruseles).

El programa de residencies gana protagonismu como espaciu de producción artística, investigación y trabayu en rede, y refuérciase la dimensión internacional del centru al traviés de proyeutos europeos d’Europa Creativa, como EMPA Extended y European Hybrid Intelligence. Nel ámbitu espositivu, la programación incluye propuestes como «De rerum natura», «La sociedá automática», de Félix Luque, proyeutos basaos en percorríos urbanos y nueves llinies de trabayu venceyaes a los programes europeos.