Laboral Centru d’Arte y el Muséu Nacional Thyssen-Bornemisza afiten una alianza hasta’l 2028 pa impulsar la creación asturiana

Laboral Centru d’Arte y Creación Artística y el Muséu Nacional Thyssen-Bornemisza oficializaron ayeri en Xixón un alcuerdu de collaboración que va estendese hasta’l 2028. L’alcuerdu va permitir qu’artistes que viven n’Asturies presenten les sos propuestes performatives nel prestixosu muséu madrilanu y que’l centru asturianu acueya dalgunes de les aiciones artístiques desendolcaes nel ciclu Visión y Presencia del Thyssen-Bornemisza.

La conseyera de Cultura, Política Llingüística y Deporte del Principáu d’Asturies, Vanesa Gutiérrez, valoró mui positivamente la firma del alcuerdu y destacó la so relevancia estratéxica: “Ye un pasu firme pa texer redes y xenerar oportunidaes pa la creación contemporánea y p’asitiar l’arte asturianu nel circuitu estatal ya internacional”. Esti oxetivu coneuta direutamente colos valores de la candidatura Uviéu Capital Europea de la Cultura 2031, como la proyeición esterior, el trabayu en rede y l’apueste pola creación contemporánea.

Na mesma llinia espresóse Semíramis González, direutora de Laboral Centru d’Arte y Creación Artística y comisaria d’artes plástiques pa la candidatura Uviéu 2031, que sorrayó que l’alcuerdu “pon en diálogu direutu a dos centros de gran relevancia, apuesta pola visibilidá de les creadores contemporánees y fortalez les redes culturales ente territorios”.

La firma del conveniu nun foi, precisamente, protocolaria. L’artista asturiana Mónica Cofiño, tamién comisaria d’artes escéniques contemporánees pa la candidatura d’Uviéu 2031, tresformó l’actu nuna aición performativa con forma de boda simbólica, desarrollada por La Santa Bercina. Arte contemporaneu, sí, pero con humor y un claru arume a berza.

Cofiño va ser una de les artistes que presenten el so trabayu nel Thyssen-Bornemisza, xunto con María Vallina, con Silenciu rotu pa un alcuentru nes llendes habitables. Pela so parte, Laboral Centru d’Arte va acoyer tres performances nel primer añu de collaboración: la primera, de l’artista asturiana Noemí Iglesias Barrios, el 24 d’abril; el 11 de xunu, Agnes Essonti va tresformar una comida comunitaria nun espaciu d’intercambéu alredor de los raigaños, el cuerpu y les comunidaes migrantes; y va zarrar el ciclu Teresa Correa, el 15 d’ochobre.

Na presentación del alcuerdu tamién tuvo presente Guillermo Solana, direutor artísticu del Muséu Nacional Thyssen-Bornemisza, que celebró la creciente presencia del arte performativu nes sales del muséu y espresó’l so deséu de que’l conveniu se renueve y s’amplíe a más programes.