Ye una plataforma de producción, esperimentación y difusión dedicada a la creación sonora electrónica, l’arte dixital y l’audiovisual contemporaneu. Nacíu en Xixón y con más de 19 años de trayeutoria, LEV ye un espaciu d’investigación y alcuentru ente artistes consolidaos, nuevos talentos y públicos diversos, siempres al ritmu de la innovación tecnolóxica y les nueves formes d’espresión artística.

Cada edición del festival ufierta una programación vibrante y ecléutica que combina direutos audiovisuales, conciertos, actuaciones, instalaciones, esperiencies inmersives en realidá virtual y aumentada, esposiciones y talleres. A través d’estes propuestes, LEV amuesa una panorámica del estáu actual de la creación dixital y sonora, de los sos cruces con otres disciplines y de la so capacidá pa xenerar nueves narratives.

Amás del festival añal, LEV caltién una actividá continua a lo llargo de tol añu con programes deslocalizaos como los LEVents, residencies artístiques, talleres d’herramientes dixitales creatives y collaboraciones con instituciones, redes y proyectos nacionales ya internacionales. El so desarrollu ta movíu por un espíritu inconformista y siempres en evolución, que busca romper moldes y explorar los llendes de la creatividá contemporánea.

LEV ye un espaciu pa descubrir, esperimentar y sumergise na vangarda dixital, abiertu a tol que quiera asomase al presente más sorprendende del arte y la tecnoloxía.