La ciudá bretona de Lorient sofita oficialmente la candidatura d’Uviéu a Capital Europea de la Cultura 2031

La candidatura d’Uviéu a Capital Europea de la Cultura 2031 sigue ganando apoyos nel panorama internacional. L’últimu en sumase foi l’alcalde de Lorient, Fabrice Loher, qu’unvió una carta oficial al rexidor uvieín, Alfredo Canteli, na qu’espresa‘l «firme sofitu» de la ciudá bretona a l’aspiración carbayona de convertise nun referente cultural européu dientro de seis años.

Na so misiva, fechada’l 13 d’ochobre, Loher destaca los «vínculos fondos» que xunen a Lorient y Uviéu, cimentaos na so «pertenencia común al espaciu intercélticu» y nuna «visión compartida d’una Europa de la cultura y la diversidá». El mandatariu francés tamién rescampla que la capital asturiana «encarna con puxu una identidá celta viva, fondamente arraigada nes sos tradiciones musicales, llingüístiques y artístiques».

Lorient ye conocida en tol mundu pol so Festival Intercélticu, que cada branu xunta a miles de músicos, bailadores y artistes procedentes de los territorios celtes d’Europa, ente ellos una bayurosa representación asturiana. Nesti contestu, l’alcalde bretón destaca la voluntá de la so ciudá de reforzar los llazos ente les naciones celtes y amuesa la so disposición a participar en futures iniciatives intercéltiques que xurdan de la candidatura uvieína. «Va ser un placer concretu», añade del so puñu y lletra al final de la carta, como muesa de cercanía y entusiasmu.

El sofitu de Lorient tien un valor simbólicu y diplomáticu especial, al proceder d’una ciudá que ye ún de los grandes epicentros de la cultura celta n’Europa y que caltién fondos venceyos con Asturies dende hai décades. Amás, Fabrice Loher ye una figura política destacada en Francia: enantes de ser escoyíu alcalde en 2020, ocupó dellos cargos institucionales y, brevemente, el puestu de ministru delegáu del Gobiernu francés en 2024. El so sofitu supón un importante respaldu cultural ya institucional pa la candidatura que lidera Alfredo Canteli, que busca asitiar a Uviéu nel mapa européu de la creación contemporánea.

Col sofitu de Lorient, la capital asturiana suma un sociu estratéxicu dientro del espaciu celta européu y un nuevu impulsu moral pa un proyeutu que quier amosar al continente una Asturies moderna, creativa y arguyosa de la so identidá.