Uvieu 2031 acompaña a Entrearte na so quinta edición

L’equipu d’Uviéu Capital Europea de la Cultura 2031 visitó la quinta edición d’Entrearte, l’amuesa coleutiva impulsada pola asociación de galeríes d’arte contemporaneu d’Asturies, que pue visitase hasta’l 8 de febreru na Sala Sabadell Herrero.

Baxo l’eslogan «arte, accesibilidá y diálogu contemporaneu», la esposición xunta a 13 galeríes asturianes y propón un percorríu plural, ensin un discursu únicu, nel que conviven distintes mires, llinguaxes y formatos. Cada galería presenta la obra d’un únicu artista —na so mayoría asturianos—, xenerando una amuesa na que predomina la pintura, xunto con dalgunes instalaciones y escultures.

La nómina de creadores inclúi a Iván Baizán, Cristina Avello, Gonzalo García, Mónica Dixon, Pelayo Tamargo, Tania Blanco, Juan Antón, Jorge Fernández Valdés, Martina Rodríguez Morán, Orrite, María Jesús Rodríguez y Nueve. Una propuesta qu’apuesta por abrir l’arte a nuevos públicos y reforzar la so dimensión social al traviés de programes específicos de mediación y actividaes inclusives.

Iniciatives como Entrearte ayuden a fortalecer l’ecosistema creativu llocal, fomenten l’asociacionismu y asitien a Uviéu y Asturies nel mapa del arte contemporaneu. Valores como l’accesibilidá, la participación y el diálogu cola ciudadanía formen parte del ADN d’esta amuesa y coneuten cola visión d’Uviéu 2031 como un proyeutu cultural abiertu, diversu y compartíu.