Cultura destina más de 1,1 millones d’euros pa protexer y difundir el patrimoniu cultural asturianu

La Conseyería de Cultura del Principáu d’Asturies publicó nel BOPA cinco convocatories de subvenciones destinaes a sofitar actuaciones d’investigación, conservación, restauración y difusión del patrimoniu cultural asturianu, con un presupuestu total de 1,11 millones d’euros, que se concederán en réxime de concurrencia competitiva.

Les ayudes tán dirixíes a persones físiques, entidaes ensin ánimu de llucre, empreses y corporaciones llocales, y abarquen tantu patrimoniu material como inmaterial, reforciando una visión de la cultura como motor d’identidá, cohesión social y futuru, valores estrechamente venceyaos a la candidatura d’Uviéu a Capital Europea de la Cultura 2031.

La financiación inclúi sofitu pa la conservación d’estructures tradicionales como hórreos y paneres, la restauración de bienes protexíos, proyectos arqueolóxicos, la puesta en valor del patrimoniu cultural y la tradición oral, amás de la conservación de bienes patrimoniales en brañes. Les solicitúes podrán presentase de mou electrónicu nun plazu d’ente 10 y 20 díes dende la so publicación nel BOPA. El Principáu destaca tamién l’importante incrementu del presupuestu destináu al patrimoniu nos últimos años y anuncia nueves llinies de subvenciones pa los próximos meses, ente elles una convocatoria específica pa llagares tradicionales de sidra.