Uviéu defenderá la so candidatura a Capital Europea de la Cultura na primer selmana de marzu

Uviéu desplazaráse a Madrid na primer selmana de marzu pa defender la so candidatura a Capital Europea de la Cultura 2031, nun procesu nel que compite con Burgos, Cáceres, Granada, Xerez de la Frontera, Las Palmas de Gran Canaria, Palma, Potries y Toledo, les otres ciudaes españoles escoyíes pa optar al títulu, que España compartirá con Malta nesi añu.

La capital asturiana ye una de les nueve ciudaes candidatures anunciaes pol Ministeriu de Cultura, que tienen que superar esta primer fase de seleición. Tres les defensas delantre del comité d’espertos y espertes internacionales, el Ministeriu dará a conocer a lo llargo del mes de marzu qué ciudaes pasen a la fase final del procesu.

La evaluación correrá a cargu d’un comité independiente formáu por doce persones espertes, diez d’elles de calter internacional, nomaes poles instituciones europees venceyaes al programa de la Capital Europea de la Cultura, y dos especialistas nomaos pol Ministeriu de Cultura. Esti comité valorará la calidá del proyectu cultural, la so dimensión europea, l’impactu a llargo plazu y el grau d’implicación de la ciudadanía.

La Capital Europea de la Cultura ye una iniciativa de la Unión Europea puesta en marcha en 1985 pa destacar la diversidá cultural del continente, fomentar el diálogu intercultural y reforzar el papel de la cultura como motor de desenvolvimientu social y económicu. Dende entós, más de 60 ciudaes europees algamaron esti reconocimientu, ente elles Madrid (1992), Santiago de Compostela (2000), Salamanca (2002) y Donostia / San Sebastián (2016).

El procesu pa optar a la capitalidá entama con seis años d’antelación y culmina cola designación oficial cuatro años enantes del añu del títulu. Pa Uviéu, la defensa de la candidatura n’esta fase supón un momentu clave dientro del proyectu Uviéu Capital Europea de la Cultura 2031 y un pasu importante pa reforzar la so proyección cultural europea.