El Muséu de Belles Artes d’Asturies presenta la so programación de febreru a xunu de 2026
El Muséu de Belles Artes d’Asturies presentó esta mañana la so programación pa los meses de febreru a xunu de 2026. L’actu contó cola intervención de la so direutora, María López-Fanjul, amás d’Antón García, direutor xeneral de Política Llingüística, y David Álvarez, conceyal de Cultura del Conceyu d’Uviéu, ente otros.
Na so intervención, la direutora del muséu sorrayó que l’oxetivu d’esta nueva etapa nun pasa per aumentar les cifres de manera xeneral, sinón per afitar una rellación duradera col públicu. «Nun nos preocupa ganar en númberu, sinón llograr que los visitantes vuelvan y se sientan a gustu», aseguró López-Fanjul.
La programación, que se va desendolcar ente febreru y xunu de 2026, pon en marcha cuatro exes estratéxicos: la internacionalización del muséu; el so acercamientu activu a tol territoriu asturianu dende Uviéu; el refuerciu del venceyu cola ciudadanía al traviés d’una llectura contemporánea y tresversal de les coleiciones; y la implantación d’estratexes de desendolcu d’audiencies en tolos ámbitos de la institución.
Ente los proyeutos destacaos figura la esposición INTERCAMBIOS, que se va poder visitar del 4 de xunu al 1 de payares del 2026 na sede uvieína del muséu. Comisariada pola Dra. Laura Baños, la muestra propón diálogos ente obres antigües y contemporánees de la coleición del muséu, articulaes alredor de cuestiones clave del sieglu XXI como la globalización, la caltenibilidá, les migraciones o la identidá.
Nel ámbitu de la internacionalización, el muséu da puxu al ciclu de conferencies «Asturies Global», que va contar cola participación de figures destacaes del panorama museísticu internacional como Gabriele Finaldi, direutor de la National Gallery de Londres; Amanda Dotseth, direutora del Meadows Museum de Dallas; o C. D. Dickerson, conservador xefe d’Escultura de la National Gallery of Art de Washington, ente otros.
La programación incluye tamién el proyeutu El Muséu de Belles Artes de (n’)Asturies, una iniciativa itinerante que va llevar el muséu a distintos puntos de la xeografía asturiana al traviés del cine al aire llibre, amás d’una amplia ufierta d’actividaes educatives, de mediación cultural, accesibilidá ya inclusión pa públicos de toles edaes.
Con proyeutos como «Tendiendo puentes», «La memoria del espaciu» y «Meeting Point», el Muséu de Belles Artes d’Asturies reforcia’l so compromisu cola comunidá y afita’l so papel como espaciu cultural de referencia na vida cultural d’Uviéu.
