La Federica: una apuesta pola educación musical y de la ópera y pol talentu infantil y mozu

Integrada por neños, neñes y mozos y moces d’ente 6 y 18 años, La Federica desenvuelve un trabayu escénicu y formativu nel que los participantes non solo interpreten enriba del escenariu, sinón que tamién conocen los distintos oficios que faen posible una producción, dende la escenografía y el vestuariu hasta los aspeutos téunicos y de coordinación. Esti enfoque permite averase a la ópera dende una perspeutiva integral y descubrir vocaciones nueves venceyaes al ámbitu cultural.

«Cuando nació La Federica, yo quería que los mozos entendieren que, pa poder ellos ser artistes, teníen que conocer los oficios dientro del mundu artísticu», esplica Heres y amiesta: «Deprenden a ser utileros, asistentes de direición, rexidores, lluces, soníu… dalgunos de los neños tienen tamién estes funciones dientro de La Federica».

El proyeutu, entamáu pola pedagoga y creadora Maite García Heres, parte de la convicción de que la ópera tien un gran potencial educativu. Nesta llinia, La Federica trabaya tamién na ellaboración de materiales y módulos didáuticos que faciliten la incorporación de les artes escéniques y musicales al ámbitu escolar, contribuyendo a esparder esti conocimientu ente’l profesoráu y l’alumnáu.

Amás, les creaciones operístiques permiten tratar temátiques universales y facer nueves llectures que les traen al presente, a la realidá de los neños y neñes, a pensar cuestionando ya interpretando. La Federica ye deprender faciendo y participar creando. La so nueva producción de Carmen adauta’l llibretu y el llinguaxe escénicu pa facelu accesible al públicu mozu, ufriendo una llectura contemporánea del rellatu que trata temes como la llibertá, la igualdá o la violencia machista dende una mirada actual y cercana a les nueves xeneraciones. La propuesta demuestra que la ópera infantil y xuvenil nun ye un formatu menor, sinón una ferramienta valiosa pa la mediación cultural y la formación de públicos.

«Estos neños tienen un bagaxe tremendu pa la edá que tienen. Apasióna-yos la música, da igual el xéneru; son culturalmente tan activos o más que los adultos, y tienen ente 10 y 17 años», asegura Heres.

Pensar nel futuru del ecosistema cultural implica fomentar l’accesu a la cultura dende edaes tempranes y acompañar el desenvolvimientu del talentu creativu nel territoriu. Nesti sentíu, esti proyeutu conviértese nun esponente del talentu asturianu y simboliza’l compromisu de la Fundación Ópera d’Uviéu, una de les instituciones seña de la ciudá, con un ampliu potencial de crecimientu n’ámbitos como l’anovación, la educación artística y la participación.