La comunidá cultural d’Asturies despídese de Sergi Martí, cofundador de La Benéfica de Piloña
La comunidá cultural d’Asturies ta de llutu pola muerte de Sergi Martí (Molins de Rei, 1969), ún de los fundadores de La Benéfica de Piloña, que finó a los 56 años tres dellos meses d’enfermedá. La noticia conmocionó fondamente a la comunidá llocal y artística que, mientres años, atopó nesti espaciu d’Infiestu un llugar d’alcuentru, creación y celebración compartida.
L’artista Rodrigo Cuevas, ún de los impulsores de La Benéfica xunto con Sergi y Nacho Somovilla, destacó la so bondá y compromisu constante, recordándolu como un “piloñés d’adopción y d’amor”.
Dende La Benéfica compartióse un mensaxe de despidida n’asturianu nel que tamién s’anuncia la cancelación del Antroxu previstu pal próximu sábadu. La organización considera estos díes como un tiempu pa la reflexón y la memoria compartida, polo que unu de los sos eventos más esperaos nun va celebrase.
Sicasí, l’espaciu cultural va caltener les puertes abiertes pa acoyer actividaes entamaes por otres asociaciones ya instituciones, fiel a la idea d’un espaciu compartíu y vivu que Sergi defendió siempres. Quienes lu conocieron recuerden el so calter cercanu, amable y allegre, asina como la so capacidá pa texer comunidá.
Sergi llegó a Asturies hai más de trés décades y fixo de Piloña’l so llar. Dende ellí ayudó a poner en marcha un proyectu que trespasó l’ámbitu llocal, convirtiéndose nun referente de la cultura comunitaria nel mediu rural asturianu, amestando tradición ya innovación, celebración y pensamientu críticu.
Dende la candidatura d’Uviéu 2031 a Capital Europea de la Cultura queremos treslladar el nuesu pésame a la familia, amistades y a la comunidá de La Benéfica de Piloña pola muerte de Sergi Martí. La so trayeutoria y el llegáu colectivu que dexa na cultura comunitaria d’Asturies formen yá parte de la hestoria cultural del nuesu territoriu. Iniciatives como La Benéfica demuesen que la cultura ye tamién rede, cuidu y una visión compartida de futuru.
Habrá más Antroxos, porque la celebración ye parte esencial de la identidá cultural d’Asturies. El llegáu de Sergi, el so puxu y la so manera de construyir comunidá van siguir vivos na memoria cultural del país.
