PÚBLICA 26 refuerza’l debate européu sobre cultura cola presencia del equipu de la candidatura d’Uviéu 2031
Baxo’l llema “Cultura para todo”, la decimosexta edición de PÚBLICA consolídase como unu de los grandes foros internacionales pa profesionales del sector cultural n’España y Iberoamérica. L’alcuentru, entamáu pola Fundación Contemporánea, cola collaboración de Acción Cultural Española (AC/E), punxo’l focu nuna cuestión clave pal presente y el futuru de les ciudaes europees: cómo midir l’impactu de la cultura y cómo equilibrar la so rentabilidá económica col so valor intanxible.
Nesti contestu, Uviéu 2031 participó nos espacios de reflexón y networking del alcuentru. La direutora artística de la candidatura, Natalia Álvarez Simó, intervino nel formatu “Una cerveza con…”, un espaciu d’intercambiu cercanu y direutu ente profesionales que permitió compartir esperiencies, aprendizaxes y retos nun ambiente distendíu. Pela so parte, la consultora esterna de la candidatura, Cristina Farinha, formó parte d’un panel d’espertos centráu nel análisis del legáu y los desafíos de les Capitales Europees de la Cultura. El debate abordó cuestiones como la cooperación internacional, la sostenibilidá de los proyectos más allá del añu de celebración y l’impactu real nos territorios, con especial atención a les iniciatives rurales y perifériques que tán redefiniendo’l mapa cultural contemporaneu.
La edición d’esti añu confirmó, amás, una tendencia clara: el sector cultural apuesta cada vez más pol trabayu en rede, la collaboración públicu-privada y la incorporación de nueves xeneraciones de profesionales. Nun entornu abiertu y esperimental, PÚBLICA 26 reafítase como un espaciu clave pa fortalecer l’ecosistema cultural y avanzar escontra modelos más participativos, inclusivos y sostenibles.
Pa Uviéu 2031, la presencia nesti foru internacional supón una oportunidá estratéxica pa siguir posicionando la candidatura nel ámbitu européu, compartir conocimientu con otres ciudaes y consolidar alianzes. Porque si daqué quedó claro nesta edición ye que la cultura constrúyese en rede.
