Uviéu homenaxea a cuatro muyeres referentes de la cultura asturiana

La cultura constrúyese sobre’l respetu, la igualdá y el reconocimientu del talentu. Con esti espíritu, la Conceyalía d’Igualdá y Polítiques Sociales del Ayuntamientu d’Uviéu, col sofitu del equipu de la Capital Europea de la Cultura, celebró’l Día Internacional de les Muyeres, poniendo’l focu nel so papel como creadores, protagonistes y tresmisores del arte, la lliteratura y les tradiciones.

L’actu quixo visibilizar y celebrar la contribución de tantes muyeres que, col so trabayu y esfuerciu, contribuyeron a tresformar la nuesa sociedá y a enriquecer la so vida cultural. Esta iniciativa enmárcase tamién nel compromisu de la ciudá con una cultura abierta, diversa y participativa, valores que inspiren la candidatura d’Uviéu a Capital Europea de la Cultura 2031.

La conceyala d’Igualdá y Polítiques Sociales, María Velasco, destacó na so intervención institucional que’l verdaderu progresu algámase cuando les muyeres pueden decidir llibremente’l so propiu camín, desenvolver el so talentu y construyir el so proyectu de vida, seya formando una familia o impulsando la so trayeutoria profesional.

“Garantizar la igualdá de derechos nun ye namái una cuestión de xusticia, sinón que tamién fortalece una cultura más diversa, plural ya inclusiva”, señaló.

La campaña del 8M simboliza precisamente esi trabayu colectivu que, xeneración tres xeneración, foi abriendo puertes. Nel actu tamién se quixo reconocer el llexáu de madres y güeles que nos educaron en valores de xusticia, igualdá y respetu, y que fixeron posible los avances d’anguaño.

Nel marcu de la celebración rindióse homenaxe a cuatro muyeres venceyaes al ámbitu cultural asturianu, referentes pola so trayeutoria, talentu y compromisu:

• Purita de la Riva, concertista y docente, reconocida tamién pola so defensa del patrimoniu musical y rexonal.
• Carmen Benedet, pionera del galerismu n’España y figura clave pal impulsu del arte contemporaneu (que nun pudo asistir por atopase indispuesta).
• Consuelo Vallina, una de les figures más influyentes del arte contemporaneu n’Asturies.
• Elise Florentino, artista visual y figura emerxente del panorama artísticu actual.

Estes cuatro creadores representen distintes xeneraciones y mirades dientro del mundu del arte, pero comparten daqué esencial: la so capacidá pa abrir caminos y convertise en referentes pa les neñes y muyeres del futuru.

Con iniciatives como esta, la Conceyalía d’Igualdá y Polítiques Sociales reafita’l so compromisu con una cultura que reconoz el talentu femenín, promueve la igualdá d’oportunidaes y entiende la creación como una ferramienta de tresformación social, una visión que tamién acompaña’l proyectu cultural d’Uviéu 2031.