La futura Casa de les Artes d’Uviéu suma nuevos espacios pa la creación, la formación y la vida cultural de la ciudá

La futura Casa de les Artes d’Uviéu avanza na so definición como ún de los proyeutos culturales más relevantes de la ciudá. L’anteproyeutu del equipamientu, que se va asitiar nel entornu del antiguu Palaciu de los Neños, plantea un complexu cultural pensáu pa integrar creación artística, formación, esperimentación y programación nun espaciu d’alredor de 11.000 metros cuadraos.

L’edificiu va cuntar con una gran sala principal con capacidá aproximada pa 800 persones, pensada como espaciu d’ensayu pa la Oviedo Filarmonía y preparada tamién pa acoyer conciertos y otres actividaes abiertes al públicu. A ella va sumase una sala específica pa la Banda de Música y la Banda de Gaites Ciudá d’Uviéu, amás de dos sales destinaes a propuestes emerxentes, ensayos y actividaes educatives.

El proyeutu incorpora tamién espacios dedicaos a la creación y la esperimentación artística, como una plataforma de creación radiofónica dirixida a xóvenes y una sala de grabación musical. Ente los equipamientos previstos destaquen amás una mediateca pa audiciones y proyecciones venceyaes al ámbitu musical, cuatro árees pa talleres formativos y diez sales d’ensayu destinaes a músicos y agrupaciones.

La Casa de les Artes va cuntar amás con espacios abiertos al públicu que van permitir ampliar la esperiencia cultural del edificiu, ente ellos una llibrería especializada en música y artes, una cafetería o restorán y una terraza–mirador con vistes al Parque d’Inviernu y a la sierra del Aramu. Esti nuevu equipamientu cultural plantegase como una de les infraestructures clave pa reforzar la vida cultural de la ciudá y contribuyir al impulsu de la candidatura d’Uviéu a Capital Europea de la Cultura en 2031.