L’equipu d’Oviedo viaxa a Madrid pa defender mañana la so candidatura a Capital Europea de la Cultura 2031

Parte del equipu encargáu de la candidatura d’Oviedo a Capital Europea de la Cultura 2031 partió güei escontra Madrid, onde s’alcontrará col restu de la delegación —encabezada por Rodolfo Sánchez Farpón— pa participar na defensa del proyectu delantre d’un comité internacional d’espertos nel Ministeriu de Cultura. La presentación tendrá llugar mañana pela mañana y forma parte del procesu de selección que va determinar qué ciudaes siguen na carrera pol títulu de Capital Europea de la Cultura 2031.

Tres meses de trabayu, l’equipu presentará ante’l comité los principales exes de la propuesta, un proyectu cultural que busca implicar a la ciudadanía, al sector cultural y a tol territoriu asturianu. La iniciativa pon el focu na cultura como motor de tresformación social, diálogu y desenvolvimientu.

Oviedo compite nesti procesu con otres ciudaes españoles que tamién aspiren al títulu: Burgos, Cáceres, Granada, Xerez de la Frontera, Las Palmas de Gran Canaria, Palma de Mallorca, Potries (Valencia) y Toledo.

Mientres la sesión, les ciudaes candidates tendrán d’esponer la so propuesta y responder a les preguntes del comité, encargáu d’evaluar la solidez de los proyectos y la so dimensión cultural, social y europea.

Una vegada remataes les presentaciones, el comité anunciará el vienres qué ciudaes pasen a la siguiente fase del procesu de selección. La ciudá que llogre’l títulu de Capital Europea de la Cultura 2031 n’España darase a conocer a finales de 2026, tres completase les distintes fases d’evaluación.

La candidatura d’Oviedo aspira a consolidar la cultura como exa de desenvolvimientu pa la ciudá y el so entornu, reforzando la so proyección europea y la so capacidá de xenerar redes culturales en tol territoriu.