Uviéu 2031 presenta na FIDMA los sos nuevos proyectos pa la seronda

Oviedo 2031 presentó esti llunes, nel estand del Conceyu d’Uviéu na Feria Internacional de Muestres d’Asturies, los proyectos que va poner en marcha esti seronda.

L’actu cuntó cola presencia de Lourdes García López, conceyala delegada d’Educación, Salú Pública y Consumu, y coles intervenciones de Rodolfo Sánchez Farpón, director de la candidatura, y Zoe López, codirectora artística.

Sánchez Farpón repasó’l momentu nel que s’atopa la candidatura, una de les cuatro finalistes españoles pa convertise en Capital Europea de la Cultura en 2031. “Anque Uviéu ye la ciudá que opta al títulu, porque asina lo esixe Europa, dende’l primer momentu concebimos la candidatura como un proyectu de toa Asturies”, señaló.

Pela so parte, Zoe López presentó Pequeñes Acciones pola Amabilidá, una iniciativa que va coneutar a artistes y centros educativos al traviés de procesos de creación compartida. Van seleccionase un máximu de doce propuestes, que se van desenvolver nos centros ente ochobre y avientu.

La codirectora artística avanzó tamién la programación de seronda de Puxa el Barriu, que va incorporar nueves actividaes en distintos barrios y núcleos del conceyu, y presentó una publicación en Llectura Fácil destinada a esplicar la candidatura de manera clara y accesible.

“La Capital Europea de la Cultura nun entama en 2031, sinón dende agora mesmo, en cada procesu, cada alcuentru y cada persona que decide formar parte d’ella” afirmó López.