Oviedo 2031 recibe casi un centenar de propuestes pa la convocatoria de Pequeñas Acciones pola Amabilidá
El plazu acabó’l pasáu vienres, 18 de setiembre, dempués de tar abiertu daqué más d’un mes a artistes y colectivos. Les candidatures recibíes abarquen una amplia variedá de llinguaxes y disciplines, ente elles teatru, música, danza, pintura, poesía o clown, amás de propuestes que combinen distintes práutiques artístiques.
Una parte importante de les inscripciones concentróse nos últimos díes de la convocatoria, especialmente na xornada de cierre. A partir d’agora va empezar el procesu de selección, del que van salir un máximu de doce proyectos. Les propuestes escoyíes van formar parte d’un catálogu que se va poner a disposición de los centros educativos del conceyu, que van poder conocer los distintos proyectos y escoyer aquellos que meyor s’adapten a les sos comunidaes educatives.
Cada iniciativa va desenvolvese al traviés d’un procesu de mediación y cocreación con neños, neñes y mocedá, que van participar activamente nes distintes fases del trabayu. Los proyectos van contar con un mínimu de cinco sesiones y una dotación máxima de 3.000 euros pal so desenvolvimientu.
Pequeñas Acciones pola Amabilidá da continuidá al trabayu entamáu nel cursu pasáu, cuando una ventena d’artistes collaboraron con más de 30 centros educativos pa esplorar, al traviés de distintos llinguaxes creativos, qué significa la Amabilidá y cómo se rellaciona con cuestiones como la convivencia, la igualdá, la sostenibilidá, la escucha o la participación.
Esti procesu culminó’l 9 de mayu cola Marcha pola Amabilidá, na que más de 2.500 neños y neñes percorrieron les cais d’Uviéu amosando pancartes, coreografíes, música, vestuariu y otres creaciones ellaboraes previamente nes aules.
Con esta nueva edición, Oviedo 2031 quier siguir reforzando la rellación ente cultura y educación y xenerar espacios d’alcuentru nos que artistes y comunidaes educatives puedan esperimentar, crear y desenvolver proyectos de manera compartida.
