Kuivi Almacenes acueye un alcuentru p’averar la candidatura d’Uviéu 2031 a la ciudadanía
Uviéu sigue dando pasos firmes na so candidatura a Capital Europea de la Cultura 2031 con una cita abierta nueva a la ciudadanía. El próximu xueves 16 d’abril, l’espaciu Kuivi Almacenes va acoyer a les 20:00 hores un «Alderique Amable», un alcuentru pensáu p’averar el proyeutu a la xente, resolver duldes y, sobre too, convidar a la participación coleutiva.
España va ser ún de los dos países anfitriones de la Capital Europea de la Cultura en 2031, y cuatro ciudaes españoles llegaron a la fase final del procesu de seleición: Uviéu —en representación de toa Asturies—, xunto con Cáceres, Granada y Las Palmas de Gran Canaria.
Nesti contestu, la cita va sirvir pa compartir col texíu l’estáu actual de la candidatura y los retos que queden per delantre hasta la decisión final, prevista pa finales d’esti añu. L’alcuentru ta abiertu a toles persones interesaes en saber más, aportar idees o formar parte activa d’esti procesu, con entrada llibre hasta completar aforu.
Como pieslle, la xornada va contar a partir de les 21:30 hores con un conciertu d’Elena del Frade, que va poner el broche musical cola so propuesta de pop enérxico y baillable.
Una oportunidá pa escuchar, preguntar y sumase a un proyeutu que mira a Europa ensin perder de vista los sos raigaños. Porque si daqué tienen claro Uviéu y toa Asturias ye qu’esta candidatura constrúyese ente tola ciudadanía.
