A partir del 7 d’abril van declarar a los horros patrimoniu cultural inmaterial

Tan asturianos como la sidra o la fabada, los horros tán a piques de dar un pasu históricu: el próximu 7 d’abril, el Conseyu de Ministros va aprobar la so declaración como patrimoniu cultural inmaterial, pola propuesta del ministru de Cultura, Ernest Urtasun.

Esto supón un blindaxe real pal so futuru. Porque protexer los horros nun ye solo cuidar la madera y los pegoyos, sinón tamién tolo que caltienen: saberes tradicionales, oficios, formes de vida y una manera d’entender el territoriu que sigue viva n’Asturies y en tol norte.

Equí, onde hai casi tres horros per quilómetru cuadráu, formen parte del paisaxe y tamién de la identidá. Asina lo recuerda la conseyera de Cultura, Vanessa Gutiérrez, al destacar qu’esti reconocimientu refuerza años de trabayu pa garantizar el so caltenimientu como símbolu coleutivu.

Porque ye verdá que munchos yá nun guarden la collecha, pero siguen guardando daqué igual de valioso: la memoria. Y non siempre ye fácil caltenela en pie. L’abandonu, la perda d’usu o la desconexón xeneracional amenacen estes construcciones úniques, lo que fai entá más urxente la so proteición. Nesi llabor, iniciatives públiques y entidaes como l’Asociación del Horru Asturianu lleven tiempu recordando lo evidente: cada horro que se pierde ye una historia menos que contar.

Esti reconocimientu encaxa dafechu cola mirada d’Uviéu 2031 y con entender la cultura como daqué vivo, cotidiano y compartío. Porque’l patrimoniu nun ye solo lo qu’almiramos, sinón lo que siguimos cuidando.