L’Asturies d’esterior impulsa con fuerza la candidatura d’Uviéu 2031 nun actu multitudinariu en Madrid

L’Asturies del esterior amosó esti miércoles un sofitu rotundu a la candidatura d’Uviéu a Capital Europea de la Cultura 2031 nun actu multitudinariu celebráu nel Movistar Arena de Madrid baxo’l títulu “Asturies capital”. La cita, entamada por LA NUEVA ESPAÑA al traviés del so canal nuevu Asturies Esterior, xuntó a personalidaes asturianes residentes en Madrid y a abondos asistentes que llegaron dende’l Principáu, nun alcuentru que reivindicó la fuercia y el talentu de la diáspora asturiana.

Ainhoa Moll, axunta a la Presidencia y direutora editorial de Prensa Ibérica, destacó la sintonía ente la candidatura uvieína y el proyeutu Asturies Esterior, dos iniciatives que comparten la voluntá de proyeutar Asturies “más alto y más allá”. L’alcalde de Madrid, José Luis Martínez-Almeida, participó na so condición de “Nuncio uvieín” y sorrayó’l calter cultural, vibrante y de futuru d’Uviéu.

Nel actu, Ángeles Rivero, direutora xeneral de Prensa Ibérica p’Asturies y Castiella y Lleón, presentó oficialmente Asturies Esterior, un canal que naz pa coneutar colos casi 300.000 asturianos que viven fuera del Principáu y que conformen, en pallabres de la periodista, “el conceyu númberu 79” de la rexón.

L’alcalde d’Uviéu, Alfredo Canteli, defendió que la candidatura de 2031 ye “una oportunidá única” y un proyeutu que, magar naz n’Uviéu, pertenez a toa Asturias, dientro y fuera de les sos fronteres. Tamién intervinieron Rodolfo Sánchez y Natalia Álvarez Simó, direutor y direutora artística d’Uviéu 2031, que sorrayaron la importancia del consensu territorial y el papel clave de la diáspora como embaxadora natural del proyeutu, amás del puxu qu’esta candidatura supón pa la proyeición europea del sector cultural asturianu.

L’alcuentru dexó claro que la ilusión por Uviéu 2031 estiéndese más p’allá del territoriu asturianu y que la comunidá del esterior va ser un sofitu decisivu nesti camín a Europa.