Xixón sofita la candidatura d’Uviéu como Capital Europea de la Cultura 2031
L’Alcalde d’Uviéu, Alfredo Canteli, aconceyó ayeri cola Alcaldesa de Xixón, Carmen Moriyón, col oxetivu de consiguir el sofitu de la ciudá vecina pa la candidatura d’Uviéu a Capital Europea de la Cultura en 2031. La respuesta foi bien positiva, dexando claro que Xixón sofita esta candidatura. Esti alcuentru marca l’entamu d’una serie de visites que Canteli tien previstes a distintos conceyos asturianos pa xuntar apoyos a esta iniciativa cultural.
En llegando al Conceyu de Xixón, Canteli declaró: “Queremos ser Capital Europea de la Cultura y falamos abiertamente de la integración d’otros conceyos porque consideramos qu’esta capitalidá nun implica namái a Uviéu, sinón a too Asturies. Nesa llinia venimos de falar cola Alcaldesa”.
Esta visita a Xixón ye la primera de delles que Canteli tien previstes a otros conceyos asturianos, como Avilés, Siero, Mieres o Llangréu, cola fin d’afitar una candidatura fuerte y representativa de tola comunidá. El proyeutu yá cuenta col sofitu unánime de tolos grupos de la corporación municipal d’Uviéu y col preste esplícitu del Gobiernu del Principáu.
