Uviéu defiende en Madrid la so candidatura a Capital Europea de la Cultura con “amabilidá” y orgullu asturianu

L’equipu de la candidatura d’Uviéu a Capital Europea de la Cultura 2031 vuelve a casa dempués d’una intensa xornada en Madrid cola sensación d’haber fechu un bon trabayu. Tres meses de preparación, el proyectu asturianu defendió la so propuesta ante’l xuráu internacional con un mensaxe marcáu pola “amabilidá”, acompañáu de guiños a la identidá cultural asturiana —como la tonada, la gaita o les mazanes— y con un equipu que tresmitió convencimientu, ilusión y compromisu col futuru cultural del territoriu.

La delegación asturiana presentó mientres media hora les principales llinies del proyectu y respondió depués, durante una hora, a les entrugues del comité de selección, integráu por diez espertos europeos. La decisión sobre qué ciudaes superen esta primer fase del procesu darase a conocer esti vienres hacia les 13:00 hores.

L’equipu encargáu de presentar la candidatura tuvo formáu por diez persones procedentes de distintos ámbitos del sector cultural, institucional y científicu. Ente ellos participaron l’alcalde d’Uviéu, Alfredo Canteli; la conseyera de Cultura del Principáu, Vanessa Gutiérrez; el bioquímicu Carlos López Otín; el director de la candidatura, Rodolfo Sánchez; o l’exviceconseyero de Cultura, Jorge Fernández León. La intervención realizóse n’inglés, castellanu y asturianu, destacando la diversidá llingüística y cultural d’Asturies.

La sesión estructuróse nuna primer parte de presentación del proyectu y un turnu posterior d’entrugues por parte del xuráu, que s’interesó especialmente pol programa artísticu de la candidatura y pola capacidá organizativa y presupuestaria pa llevalu alantre.

El mensaxe central d’Uviéu xiró alredor del conceutu de la “amabilidá”, plantegáu como una respuesta necesaria dende Asturies a un contestu internacional marcáu pola confrontación y el conflictu, proponiendo la cultura como ferramienta pa fomentar el diálogu, el consensu y la empatía.

Tres la presentación, de la que l’equipu salió con mui bones sensaciones, l’alcalde d’Uviéu, Alfredo Canteli, destacó’l trabayu realizáu nestos meses. “Con munchos nervios, muncha ilusión, pero tamién con munchu compromisu. L’equipu trabayó muncho y respondió a toles entrugues del xuráu con gran precisión y responsabilidá”. Canteli sorrayó amás el sofitu social y territorial a la candidatura: “Uviéu y tol territoriu asturianu tán pendientes de lo que ta pasando güei en Madrid. Tien que pasar dalgo bono. Yo toi cargáu d’ilusión y de ganes porque esto salga, por Uviéu y por tola Asturies”.

La conseyera de Cultura, Vanessa Gutiérrez, realizó la so intervención final n’asturianu, destacando’l valor de contar con una llingua propia y minorizada y el so papel como elementu d’identidá cultural. “Hai un proyectu que va más allá de la ciudá, un proyectu de tola Asturies que cuenta col total sofitu del Gobiernu del Principáu”, señaló.

Gutiérrez sorrayó amás que la candidatura responde a una visión cultural de llargu percorríu. “Hai una fueya de ruta y un proyectu que va más allá d’una candidatura a la Capitalidá Europea; tien que ver col porvenir del Principáu y pasa por apostar pola cultura, pola participación y polos derechos culturales de los asturianos”.

L’equipu treslladó al xuráu que la candidatura constitúi un proyectu colectivu respaldáu por persones de distintos ámbitos del sector cultural, alministraciones públiques, entidaes, colectivos y tamién de calter interxeneracional, reflexando la diversidá del ecosistema cultural asturianu. La propuesta defiende la cultura como ferramienta tresformadora pal territoriu, col oxetivu de reforzar el texíu cultural, impulsar la participación ciudadana y contribuyir a afrontar retos como la retención del talentu mozu n’Asturies.

Tres la capital asturiana presentaron los sos proyectos Palma de Mallorca, la llocalidá valenciana de Potries y Toledo, siguiendo un orde alfabéticu. El comité internacional anunciará esti vienres qué ciudaes superen esta primer fase del procesu de selección. La decisión final sobre qué ciudá será Capital Europea de la Cultura en 2031 conocerase a finales d’esti mesmu añu.