Los hórreos van ser declaraos patrimoniu cultural inmaterial a partir del 7 d’abril

Tan asturianos como la sidra o la fabada, los hórreos tán a piques de dar un pasu históricu: el próximu 7 d’abril, el Conseyu de Ministros va aprobar la so declaración como patrimoniu cultural inmaterial, a propuesta del ministru de Cultura, Ernest Urtasun.

Esto supón un blindaxe real pal so futuru. Porque protexer los hórreos nun ye solo caltener la madera y los pegoyos, sinón tamién too lo que contienen: saberes tradicionales, oficios, formes de vida y una manera d’entender el territoriu que sigue viva n’Asturies y en tol norte.

Equí, onde hai casi tres hórreos por quilómetru cuadráu, formen parte del paisaxe y tamién de la identidá. Asina lo recuerda la conseyera de Cultura, Vanessa Gutiérrez, al destacar que esti reconocimientu refuerza años de trabayu pa garantizar la so pervivencia como símbolu colectivu.

Porque sí, munchos yá nun guarden colleches, pero siguen guardando daqué igual de valioso: la memoria. Y nun siempres ye fácil caltenela en pie. L’abandonu, la perda d’usu o la desconexón xeneracional amenacen estes construcciones úniques, lo que fai entá más urxente la so protección. Nesi llabor, iniciatives públiques y entidaes como la Asociación del Hórreo Asturiano lleven tiempu recordando lo evidente: cada hórreu que se pierde ye una historia menos que contar.

Esti reconocimientu encaxa de llenu cola mirada d’Uviéu 2031 y con entender la cultura como daqué vivo, cotidianu y compartíu. Porque el patrimoniu nun ye solo lo que admiramos, sinón lo que seguimos cuidando.