Uviéu 2031 impulsa HUELLAS, un proyeutu de fotografía collaborativa y memoria de barriu

La candidatura d’Uviéu a Capital Europea de la Cultura 2031 pon en marcha Huellas, un llaboratoriu creativu de fotografía collaborativa y memoria coleutiva que forma parte de Puxa’l Barriu, el programa impulsáu pa llevar procesos de creación artística y participación cultural a los centros sociales municipales.

La iniciativa desendólcase de manera simultánea nos centros sociales de Buenavista y La Corredoria y propón utilizar la fotografía como ferramienta d’espresión personal, creación artística y reconstrucción de les histories cotidianes que conformen la identidá de los barrios uvieínos.

Huellas ta desendolcáu poles fotógrafes y mediadores artístiques Irma Collín y Ainhoa Valle, profesionales especializaes en fotografía participativa y procesos de creación comunitaria venceyaos a la memoria coleutiva y la mediación cultural.

A lo llargo de distintes sesiones, les persones participantes van trabayar na recuperación, analís y resignificación de semeyes familiares y archivos personales venceyaos a los sos barrios. Al traviés de dinámiques creatives y collaboratives, el proyeutu busca averar la cultura y la creación contemporánea a espacios de proximidá, xenerando llugares d’alcuentru, intercambéu y participación comunitaria.

«La idea ye treslladar a les persones participantes que la cultura nun pasa namás nos museos, sinón que ta presente na vida cotidiana y ye una ferramienta qu’ayuda a fortalecer los venceyos comunitarios», esplica Pepe Mompeán, coordinador xeneral d’Uviéu 2031.

Huellas forma parte de Puxa’l Barriu, un programa col que la candidatura busca convertir los centros sociales n’espacios vivos de creación, mediación y convivencia cultural. La propuesta pon el focu nel papel de la cultura como ferramienta de cohesión social, participación ciudadana y construcción coleutiva dende los barrios.

«El proyeutu desendólcase alredor de tres exes: memoria, fotografía y barriu. La idea de fondu ye entender que la dimensión cultural ye tresversal y asocede tamién nos barrios y nos centros sociales, teniendo una dimensión interxeneracional mui importante. Tamos recopilando recuerdos, álbumes y archivos personales de la xente del barriu pa poner el focu nes pequeñes histories cotidianes que, al final, son les que terminen contando una gran historia», señala Zoe López Mediero, codireutora artística de la candidatura.

Ente los oxetivos de Huellas tán la recuperación de la memoria visual d’Uviéu, l’impulsu del diálogu interxeneracional, la creación de narratives inclusives y diverses y el fortalecimientu de la cohesión social al traviés de la cultura.

Amás de les sesiones presenciales, el programa va continuar en setiembre col desarrollu y producción d’una esposición final que va recoyer parte del trabayu realizáu mientres el procesu creativu.