Templanza, el proyectu de Puxa el barrio, pieslla en Caces con un conciertu nel llavaderu de los Tres Caños
Decenes de persones asistieron esti domingu al conciertu de pieslle de Templanza, ún de los proyectos de Puxa el barrio, el programa impulsáu pola candidatura de Uviéu 2031 a Capital Europea de la Cultura pa llevar procesos de creación artística y participación cultural a los centros sociales, barrios y núcleos rurales del conceyu.
Desendolcáu en Caces y Les Caldes, el proyectu trabayó na recuperación de la memoria colectiva al traviés de les canciones populares, la tresmisión oral y los recuerdos compartíos por vecinos y vecines.
El llavaderu de los Tres Caños, en Caces, foi l’escenariu escoyíu pa esta cita final. Mientres xeneraciones, esti espaciu foi llugar d’alcuentru, conversación y vida comunitaria, y esti fin de selmana volvió convertise nun puntu de reunión alredor de la memoria y la cultura popular.
El conciertu tuvo protagonizáu poles artistes Ana Pereda y Antía EseUve, acompañaes poles persones que nes últimes selmanes participaron nos talleres y compartieron canciones, histories y relatos venceyaos al territoriu.
Al traviés de distintes sesiones celebraes en Caces y Les Caldes, Templanza punxo en valor formes de tresmisión oral que formen parte del patrimoniu inmaterial del conceyu. El resultáu d’esti procesu presentóse nuna actuación colectiva que reconoció la importancia de conservar, activar y compartir esos saberes.
Con iniciatives como Templanza, Puxa el barrio busca fortalecer los vínculos ente cultura, territoriu y ciudadanía, averando la creación artística a los llugares onde se constrúi la vida cotidiana y reconociendo la memoria colectiva como una parte esencial del futuru cultural d’Uviéu.
